Bakı Minskə yeni silahlar sifariş edəcək - ŞƏRH

Azərbaycan Silahlı Qüvvələrinin Baş Qərargah rəisi Nəcməddin Sadıkovun Belarusa səfəri yeni silahların sifarişi ilə yanaşı, “Polonez” kimi silahların texniki xidmət məsələlərinin müzakirəsi məqsədləri daşıya bilər.

Bu fikirləri Oxu.Az-a açıqlamasında Q.V.Plexanov adına Rusiya İqtisadi Universitetinin politologiya və sosiologiya kafedrasının dosenti Aleksandr Perenciyev deyib. 

Onun sözlərinə görə, ümumiyyətlə, səfər zamanı yalnız Azərbaycan – Belarus hərbi-iqtisadi layihələri barəsində danışılmayacaq, bu sahədə müxtəlif institutların formalaşması, xüsusən, Belarus və Azərbaycan arasında hərbi-texniki sahədə əməkdaşlıq barədə sazişin imzalanması, birgə hərbi-texniki komissiyanın yaradılması, hərbi-texniki informasiyaların mübadiləsi mövzuları müzakirə ediləcək. 

Perenciyev əlavə edib ki, hətta rəsmi Bakı ilə Minsk arasında hazırda istənilən səviyyədə olmayan qarşılıqlı hərbi-diplomatik əlaqələrin genişlənməsi də mümkündür.

“Burada Rusiya hərbi rəhbərliyinin Qərb və digər ölkə nümayəndələri ilə görüş üçün danışıqlar meydançası barədə Minsk və Bakı razılığa gələ bilər”, - ekspert qeyd edib. 

O qeyd edib ki, güman etmək olar ki, Azərbaycan tərəfi Belarus istehsalı olan “Peçora-2TM” С-125-2ТМ zenit-raket kompleksi, “Osa-AK” və “Osa-AKM” özüyeriyən zenit kompleksləri, “Moskit” TQM 3T maşınları, “Kivi” radioelektron mübarizə kompleksi, “ADUNOK” müşahidə-atəş kompleksi, “Skif” və “Şerşen” tank əleyhinə raketləri ilə maraqlana bilər. 

Azərbaycan müdafiə nazirinin birinci müavini – Silahlı Qüvvələrin Baş Qərargah rəisi Nəcməddin Sadıkov avqustun 21-də Minskə rəsmi səfərə gedib. Səfərin təfərrüatı açıqlanmır. 

Ə.Ş.
www.oxu.az