İcra başçısı: “Düşmən istəyinə nail olmayıb, bunlar bizi sarsıda bilməz”

“Erməni silahlı qüvvələrinin Bərdəni atəşə tutduğu yer ticarət mərkəzləri olan ərazidir. Burada nəqliyyatın intensivliyi çox olduğu üçün seçilib”.

Oxu.Az-ın müxbirinin məlumatına görə, Bərdə Rayon İcra Hakimiyyətinin başçısı Vidadi İsayev Bərdə səfərində jurnalistlərə açıqlamasında bildirib.

Onun sözlərinə görə, 26 marketə, 30-a qədər maşına, infrastruktura, dövlət qurumlarına və evlərə zərər dəyib:

“Bilərəkdən insanların çox olduğu yerə raket atılıb. Hərəkətdə olan iki nəqliyyata qəlpə düşüb və insanlar həlak olub”.

O qeyd edib ki, 21 mülki şəxs vəfat edib, 70-ə yaxını yaralanıb:

“Ağır yaralılar var. Üç nəfər Bakı şəhərində yerləşən xəstəxanalara göndərilib. Yaralılardan digər rayonların xəstəxanasına da təxliyyə olunanlar var”.

“Düşmən istəyinə nail olmayıb. Bunlar bizi sarsıda bilməz. Biz ordumuzun gücünə inanırıq”, - deyə icra başçısı əlavə edib.

İlhamə Əbülfət