Türkiyə Trampın təhdidinə cavab verdi

Türkiyə prezidentinin mətbuat katibi İbrahim Kalın ölkəsinin Suriya kürdlərinə hücum edəcəyi təqdirdə ABŞ-ın iqtisadi tədbirlər görəcəyinə dair hədəsinə cavab olaraq bildirib ki, Türkiyə kürdlərlə deyil, terrorçularla mübarizə aparır.

Oxu.Az “RİA Novosti”yə istinadən xəbər verir ki, ABŞ prezidenti Donald Tramp Ankaranın suriyalı kürdlərə hücum edəcəyi təqdirdə Türkiyəni iqtisadi tədbirlər görməklə hədələyib.

“Suriyalı kürdləri ABŞ-ın terrorçu təşkilatlar siyahısında adı hallanan Kürdüstan Fəhlə Partiyasına (PKK) və onun Suriya filialı olan YPG-yə (kürd özünümüdafiə qüvvələri) aid etmək böyük səhvdir. Türkiyə kürdlərlə deyil, terrorçularla mübarizə aparır. Biz kürdləri və digər suriyalıları bütün terror təhlükəsindən qoruyacağıq.

Türkiyə ABŞ-ın bizim strateji əməkdaşlığımıza hörmətlə yanaşacağına ümid edir və terrorçu təbliğatın bu əməkdaşlığa təsir etməyəcəyini arzu edir”, - deyə Kalın “Twitter”də yazıb.  

O əlavə edib ki, İŞİD, PKK və YPG arasında heç bir fərq yoxdur.

“Biz onların hamısına qarşı mübarizə aparacağıq”, - deyə Türkiyə prezidentinin təmsilçisi qeyd edib.