Rusiyanın ən varlı qadınının sərvəti fantastik həddə artıb

Rusiyanın “Wildberries” beynəlxalq internet mağazasının təsisçisi Tatyana Bakalçuk sərvət artımı faizinə görə bütün dünya milyarderləri arasında lider olub.

ABŞ-ın məşhur “Forbes” nəşrinin məlumatına görə, sahibkar sərvətini il ərzində 1 000 faizdən çox artırmağa müvəffəq olub.

Mənbə yazır ki, T. Bakalçuk 13 milyard dollar sərvətlə dünyanın ən varlı adamları siyahısında 165-ci yerdədir.

Bir il əvvəl onun sərvəti bir milyard dollar qiymətləndirilirdi.

Tatyana Bakalçuk rusiyalı iş adamlarının reytinqində 13-cü, ən varlı qadınları siyahısında isə birinci sıradadır.

Sərvətini kəskin artıran digər rusiyalı isə “Telegram”ın rəhbəri Pavel Durov olub.

37 yaşlı sahibkar 17,2 milyard dollar sərvətlə “Forbes”in reytinqində 113-cü yerdə qərarlaşıb.