Meksikada təyyarə supermarketin üzərinə düşdü: Ölən və yaralananlar var - FOTO/VİDEO

Meksikanın Morelos ştatının Temiksko şəhərində təyyarə supermarketə çırpılıb.

İki mühərrikli “Beecraft King Air 90” tipli təyyarənin törətdiyi qəza nəticəsində 3 nəfər ölüb, 5 nəfər yaralanıb. Qəzada həyatını itirənlərin təyyarənin pilotu 47 yaşlı Maurisio, 34 yaşlı ikinci pilot Paulina və 46 yaşlı sərnişin Alejandra olduğu bildirilib. Yaralıların 1-i təyyarədə səyahət edən şəxs, 4-ü isə supermarketin müştərisi olub. Onlar xəstəxanaya aparılıb.

Təyyarənin qalıqları birmərtəbəli tikili olan supermarketin divarını aşaraq içəri keçib.

Təyyarənin hansı səbəbdən qəzaya uğradığı hələlik məlum deyil.

O, qəzaya düşməzdən düz bir saat əvvəl Meksikanın kurort şəhəri olan Akapulkodan havaya qalxıb.

Hadisə ilə bağlı araşdırma başlanıb.

Mənbə: TRT Haber