Monteneqroda insanları güllələyən şəxs əvvəlcə iki uşaqla anasını öldürüb - YENİLƏNİB + VİDEO

Monteneqroda Çetinye yaxınlığındakı Medovina rayon sakini, 34 yaşlı Vuk Boriloviç əvvəlcə evində kirayə qalan ailəni, sonra isə yoldan keçənləri güllələyib.

Bu barədə Monteneqro Polis Departamentinin direktoru Zoran Brdjanin “Viesti” nəşrinə məlumat verib.

Polis sözçüsü bildirib ki, Boriloviç əvvəlcə evində kirayə qalan qohumlarını güllələyib:

“O, 8 və 11 yaşlı iki uşağı ov tüfəngi ilə qətlə yetirib. Yaraladığı uşaqların anası xəstəxanada ölüb. Sonra o, bayıra çıxıb və eyni silahdan kənd sakinlərinə atəş açıb, daha 7 nəfəri öldürüb, 6 nəfəri yaralayıb”.

Öz növbəsində, növbətçi prokuror Andriyana Nastiç istintaqın sonunda bildirib ki, 9 nəfər cinayət yerində, daha iki nəfər isə xəstəxanada ölüb. Çetinye faciəsi ilə əlaqədar Monteneqro hökuməti üç günlük matəm elan edəcək.

22:14

Monteneqronun Çetinye şəhərində baş verən atışma nəticəsində 11 nəfər ölüb, daha 6 nəfər yaralanıb.

Bu barədə yerli televiziya hüquq-mühafizə orqanları məlumat yayıb.

Bildirildiyinə görə, faciəyə səbəb ailə münaqişəsi olub. Bundan sonra qatil təsadüfi yoldan keçənlərə və polisə atəş açıb. O, atışma zamanı öldürülüb.

Mənbə: İzvestiya

21:18

Monteneqronun Çetinye şəhərində naməlum şəxsin atəş açıb. Nəticədə bir neçə nəfər ölüb. Ölənlər arasında uşaqlar da var.

Bildirildiyinə görə, qatil şəhərin küçələri ilə gedərək yoldan keçənləri güllələyib. Həmçinin zərərçəkənlərin yanına təcili yardımı buraxmayıb. Bir polis başından yaralanıb.

Məlumata görə, atəş açan şəxs özü də ölüb. Onun polis tərəfindən öldürüldüyü, ya intihar etdiyi barədə açıqlama verilmir.

Hazırda ölən və yaralananların sayı dəqiq məlum deyil.

Mənbə: Gazeta.ru