Tarixdə ilk: London əsas maliyyə mərkəzi kimi birinciliyini əldən verdi

Böyük Britaniyanın paytaxtı London tarixdə ilk dəfə olaraq dünyanın əsas maliyyə mərkəzi kimi birinci yeri əldən verib.

Hazırda liderliyi Nyu-Yorkla bölüşür.

Bu barədə London administrasiyasının hesabatında qeyd edilir.

London və Nyu-York rəqabətqabiliyyətlilik sahəsində hər biri 60 bal toplayıb. Eyni zamanda, Londonun indeksi ötən illə müqayisədə bir, Nyu-Yorkun göstəricisi isə iki bənd artıb ki, bu da ona Britaniya paytaxtı ilə bərabər birinci yeri tutmağa imkan verib.

London innovasiyalar sahəsində yaxşı göstəricilərə malik olmaqda davam edir. Həmçinin, Britaniyanın paytaxtı maliyyə fəaliyyətinin miqyası, biznes infrastrukturu, bacarıqlı maliyyəçilərin cəlb edilməsi və tənzimləmə baxımından yüksək səviyyəyə malikdir. Nyu-York sərmayə qoyuluşu, sövdələşmələrin aparılması və davamlı maliyyələşdirmə üçün tələb olunan emissiya həcmi üzrə yüksək nəticə əldə edib.

Britaniyada ixrac profisiti rekord həddə - 64 milyard funt-sterlinqə (78,8 milyard dollar) çatmasına baxmayaraq, bir çox şirkət Londonda deyil, Nyu-Yorkda ilkin ictimai təklifə (IPO) doğru istiqamətini dəyişdirir.

Mənbə: Financial Times