Azərbaycan Rusiyadan xahiş etməyib - RƏSMİ
Azərbaycan Rusiyadan xahiş etməyib - RƏSMİ
“Belə müraciət üçün heç bir ehtiyac yoxdur”.
Ötən gün Rusiya Kütləvi informasiya vasitələrində Rusiya Federasiyasının idman naziri Vitali Mutkoya istinadən Azərbaycan Hökumətinin növbəti Avropa Oyunlarının Rusiyada keçirilməsi üçün Rusiya tərəfinə müraciət etdiyi, lakin Rusiyanın bu oyunları keçirməyəcəyinə dair açıqlaması yer alıb.
Azərbaycan Gənclər və İdman Nazirliyinin mətbuat xidmətindən Oxu.Az-a daxil olan açıqlamada bildirilir ki, Vitali Mutkonun Rusiya mediasına etdiyi açıqlamanın media nümayəndələri tərəfindən təhrif olunduğunu düşünərək, daha dəqiq məlumatın əldə edilməsi məqsədi ilə Rusiyanın idman nazirliynə sorğu göndəriləcək.
Nazirlik bildirir ki, heç bir halda Azərbaycan Hökuməti və ya Gənclər və idman nazirliyi Rusiyanın nəinki hökumətinə, heç ayrı-ayrı rəsmi şəxslərinə bu cür xahişlə müraciət etməyib:
“Azərbaycan İlk Avropa oyunlarına çox yüksək səviyyədə ev sahibliyi edib və Avropa Olimpiya Komitəsinin, Milli Olimpiya Komitələrinin və digər əlaqədar təşkilatların yüksək qiymətini alıb .
Azərbaycanin növbəti oyunların hansı ölkə tərəfindən təşkil edilməsinə müraciət etməsi üçün heç bir ehtiyac yoxdur. Eyni zamanda bildirirk ki, bu Avropa Olimpiya Komitəsinin və ora daxil olan Milli Olimpiya Komitələrinin və oyunları təşkil etmək niyyətində olan ölkələrin işidir. Rusiyada bu səpkili layihələr birbaşa Rusiya Olimpiya Komitəsinin səlahiyyətindədir.
İkinci Avropa oyunlarının hansı ölkə tərəfindən keçirilməsindən asılı olamayaraq, Azərbaycan ilk oyunlar çərçivəsində qazandığı informasiya potensialini və təcrübəsini bölüşməyə, eyni zamanda mütəxəssisləri bu ölkəyə dəstək və yardım üçün yönəltməyə hazırdır”.
Qeyd edək ki, Rusiya KİV-də Azərbaycanın 2019-cu il II Avropa Oyunlarını keçirmək təklifi ilə Rusiyaya müraciət etməsi barədə məlumatlar yayılıb.
Məlumatda bildirilir ki, Rusiya bu təklifi dərhal rədd edib.
“Bakı bizdən xahiş etdi ki, Avropa Oyunlarını keçirək, çünki başqa heç kim keçirmək istəmir. Ancaq biz də imtina etdik”- Rusiyanın idman naziri Vitali Mutko bildirib.
Nazir izah etməyib ki, Avropa Oyunlarına ev sahibliyi etmək təklifi nəyə görə Avropa Olimpiya Komitəsindən yox, məhz Bakıdan gəlib. Eyni zamanda Mutko Rusiyanın təklifdən niyə dərhal imtina etməsinin motivlərini izah etməyib.