Bakı-Riqa reysləri açıla bilər

Azərbaycana səfərin əsas məqsədi ölkələr arasında səmərəli siyasi və iqtisadi dialoqu davam etdirməkdir.

Oxu.Az-ın xəbərinə görə, bu sözləri Trend-ə Azərbaycanda səfərdə olan Latviyanın xarici işləri naziri Edqars Rinkeviçs deyib.

Nazirin sözlərinə görə, hazırda bir sıra obyektiv səbəblərdən iqtisadi əlaqələrdə azalma qeydə alınır.

O bildirib ki, Azərbaycanda istehsal olunan bir çox məhsul tariflər, rüsumlar və kvotalar səbəbi ilə Avropa İttifaqı bazarlarına düşmür.

“Yerli vergitutma olmasaydı, Latviya birgə iqtisadi layihələr üzrə Azərbaycanla çalışa bilərdi. Əgər bu problemləri qismən də olsa aradan qaldıran bir saziş olsaydı bu, ölkələrimiz arasında ticarətin inkişafına yol açardı. Latviya ağac emalı, kənd təsərrüfatı sahələrində öz xidmətini təklif edə bilər. Biz öz süd məhsullarımızı da təklif edə bilərik. Öz növbəsində Latviya Azərbaycanın şərabında, nar şirəsində, meyvə və tərəvəzində maraqlıdır”, - E.Rinkeviçs deyib.

Energetika sahəsində əməkdaşlıq barədə danışan nazir qeyd edib ki, Latviya Azərbaycanın enerji layihələrində maraqlıdır.

“Biz neft və qaz tədarükünün diversifikasiyasında maraqlıyıq. Biz hazırda təbii qaz bazarının liberallaşması üzərində çalışırıq. Bu, həm Azərbaycanla, həm də Mərkəzi Asiya ölkələri ilə, eləcə də Norveç, Səudiyyə Ərəbistanı və Qətərlə münasibətlərin inkişaf imkanları deməkdir”.

Nazir həmçinin qeyd edib ki, Latviya Bakı ilə Riqa arasında birbaşa reyslərin işə düşməsi üzərində də işlərini davam etdirəcək.

S.B.
www.oxu.az