Rövşən Lənkəranskiyə sui-qəsd – TƏFƏRRÜATLAR + YENİLƏNİB + FOTO

Dünən gecə İstanbulda baş verən və məşhur kriminal avtoritet Rövşən Lənkəranskinin qətlə yetirildiyi atışma ilə bağlı yeni təfərrüfarlar məlum olub.

Oxu.Az Virtualaz.org-a istinadən xəbər verir ki, İstanbuldakı mənbənin məlumatına görə, Rövşən Lənkəranskinin öz briqadasının üzvləri ilə keçirdiyi dünənki görüşdə daha iki tanınmış killer - Zaur Sumqayıtski və Vahid Bakınski də iştirak edib. Onların hər ikisi neçə illərdir Azərbaycanda axtarışdadır və hazırda Türkiyədə gizlənir.

Zaur Sumqayıtski son illər Rövşən Lənkəranskinin briqadasında olub və onun məsul tapşırıqlarını icra edib. Lənkəranskinin killerləri onun qətlindən dərhal sonra həbs olunublar.

O da məlum olub ki, Rövşən Lənkəranski qətlə yetirilərkən onunla birlikdə avtomobildə sürücüdən başqa daha iki nəfər-Lənkəranskinin sinif yoldaşı və bir Türkiyə vətəndaşı olub. Qatillər avtomat silahlardan “Range Rover”i atəşə açmağa başlayandan dərhal sonra Türkiyə vətəndaşı qaçaraq aradan çıxa bilib. Sinif yoldaşı isə (soyadı dəqiqləşdirilir) ağır yaralanıb.

18.08.2016 18:42

Rövşən Lənkəranskinin (Canıyev) İstanbulda öldürülməsi ilə bağlı bəzi təfərrüatlar məlum olub.

Oxu.Az xəbər verir ki, İstanbulun Florence Nightingale Xəstəxanasından APA-nın Türkiyə bürosuna verilən məlumata görə, avqustun 17-də gecə saat 00:30 radələrində xəstəxanaya taksi sürücüsü tərəfindən üstündə heç bir sənədi olmayan naməlum şəxs gətirilib.

Onu xəstəxananın reanimasiya şöbəsinə yerləşdiriblər. 20 dəqiqə ərzində həkim müdaxiləsi olsa da, onu xilas etmək mümkün olmayıb.

Daha sonra polis əməkdaşları onun ölkəyə Rövşən Əliyev adı ilə daxil olduğunu müəyyənləşdirib.

R.Lənkəranski xəstəxanaya yerləşdirilərkən bədənində 20-ə yaxın güllə yarası olub.

Prokurorluq əməkdaşları hadisəyə cəlb olunub və R.Lənkəranskinin güllə yaralarından öldüyünə şübhə qalmadığına görə onun nəşinin Məhkəmə Tibbi Ekspertizasına göndərilməsi zəruri sayılmayıb. Mərhumun qohumları da bu qərarla razılaşıblar.

Hazırda R.Lənkəranskinin nəşinin Azərbaycana gətirilməsi ilə bağlı hazırlıq görülür və müvafiq sənədlər hazırlanır.

Sənədlər Azərbaycanın İstanbuldakı Baş Konsulluğunda təsdiqlənəndən sonra cənazə ölkəyə gətiriləcək. 

R.Lənkəranski ilə birlikdə maşında olmuş digər şəxs isə hazırda İstanbulun Şişli Hamidiye Tədris və Araşdırma Xəstəxanasının reanimasiya şöbəsində polis nəzarəti altında saxlanılır.

Qeyd edək ki, Rövşən Canıyev “oğru dünyası”nda "Rövşən Lənkəranski" kimi tanınır. O, ilk dəfə 1996-cı ildə 2 il müddətində həbs edilib. Rövşən Caniyev atasının qatilini elə məhkəmə zalındaca güllələyib. Səbail Rayon Məhkəməsinin 4 mart 1997-ci il tarixli qərarı ilə cəzadan şərti azad olunub. 2000-ci ilin iyulunda yenidən məsuliyyətə cəlb olunub. Qəsdən adam öldürməyə cəhd və qanunsuz odlu silah, partlayıcı maddələr və qurğular əldə etmə, başqasına vermə, satma, saxlama maddəsi ilə ittiham olunub. Lakin məhkəmə onun barəsində psixi müalicəyə göndərilməsi barəsində qərar çıxarıb. 2001-ci ildə Sabunçu Rayon Məhkəməsinin qərarı ilə R. Canıyev cinayət məsuliyyətindən azad edilib.

Rövşən Lənkəranski 2009-cu ilin dekabrında Ukraynada həbs olunub, dekabrın 13-də Azərbaycana ekstradisiya edilib. Dövlət ittihamçısı R. Canıyevin 12 il müddətinə azadlıqdan məhrum edilməsini istəsə də, məhkəmə ona 2 il 10 ay 19 gün həbs cəzası kəsib.

İtaliya məhkəməsi də Rövşən Lənkəranski barəsində beynəlxalq axtarış elan edib. Bu səbəbdən o soyadını dəyişərək Əliyev edib. İtaliya məhkəməsi onu mütəşəkkil cinayətkarlıq, qəsb, rüşvətxorluq, çirkli pulların yuyulması və rəsmi sənədləri saxtalaşdırmaqda təqsirli bilib.

16:43

Rövşən Lənkəranski (Canıyev) İstanbulun Florence Nightingale Xəstəxanasında dünyasını dəyişib.

Oxu.Az APA-ya Türkiyə müxbiri xəbər verir ki, onun cənazəsinin Azərbaycana göndərilməsi üçün Azərbaycanın İstanbuldakı Baş Konsulluğunda sənədləşmə işlərinə başlanılıb.

Rövşən Lənkəranskinin atışmada yaralanmış sürücüsü isə İstanbulun Şişli Hamidiye Tədris və Araşdırma Xəstəxanasının reanimasiya şöbəsindədir.

Reanimasiya şöbəsinin həkimi Şəbnəm Türk APA-nın müxbirinə bildirib ki, onun qarın nayihəsindəki güllələr çıxarılıb.

Yaralının qol və ayaqlarında sınıqlar var, bir neçə gün reanimasiya şöbəsində qalacaq.

Polisdən isə bildirilib ki, xəstəxanaya gətirilərkən yaralının üzərində heç bir sənəd olmadığı, o, xəstəxanada “Morris” soyadı ilə qeydiyyata alınıb.

R. Lənkəranskinin qardaşı Namiq Canıyev isə telefonunu açsa da, qardaşı barədə sualı cavablandırmayıb.

15:35

Azərbaycanlı kriminal avtoritet Rövşən Lənkəranskinin ötən gecə İstanbulda güllələnməsi ilə bağlı bəzi məqamlar açıqlanıb. 

Oxu.Az Lent.az-a istinadən xəbər verir ki, İstanbul polisindən bildirilib ki, silahlı hücum zamanı Lənkəranskinin olduğu maşında ondan başqa daha iki nəfər var imiş.

Maşına atəş açan naməlum şəxslərə Lənkəranski və adamları da cavab atəşi açıblar. İstanbul polisinin açıqlamasına görə, hadisə yerində ağzına susdurucu taxılmış bir UZİ markalı avtomat və bir “Qlok” markalı tapança aşkarlanıb.

İlkin araşdırma nəticəsində məlum olub ki, hadisə yerindən tapılan silahlar avtomobildə hücuma məruz qalan şəxslərə məxsus olub. Hadisə yerindən eyni zamanda çox sayda giliz də götürülüb.

Qeyd edək ki, türkiyədə silahlı hücuma məruz qalan Rövşən Canıyevin (Lənkəranski) dünyasını dəyişməsi barədə xəbər dəqiqdir.

Bu barədə “Report”un Türkiyə müxbirinə Azərbaycanın bu ölkədəki konsulluğundan bildirilib.

E.Ə.
www.oxu.az