“2021-ci ildə neftin qiyməti nə qədər olacaq?” - Rusiyalı mütəxəssis Stanislav Mitraxoviç şərh edir
“2021-ci ildə neftin qiyməti nə qədər olacaq?” - Rusiyalı mütəxəssis Stanislav Mitraxoviç şərh edir
2021-ci il üçün Azərbaycanın dövlət büdcəsində neftin bir barelinin 40 dollar olaraq təyin edilməsi digər ölkələrdəki mövcud qiymətlərə uyğundur.
Bunu Rusiya Federasiyası Hökuməti yanında Milli Enerji Təhlükəsizliyi Fondunun və Maliyyə Universitetinin aparıcı mütəxəssisi Stanislav Mitraxoviç Media.Az-a müsahibəsində deyib:
“Məsələn, Rusiyada gələn il üçün büdcədəki bir barel neftin kəsmə qiyməti 43 dollardır ki, bu da Azərbaycan rəqəmləri ilə müqayisə edilə bilər. Buna görə də, 2021-ci ildə təxminən eyni qiymət gözlənilir. Amma o, il ərzində bir neçə dəfə dəyişə bilər, çoxlu fərqli amillər mövcuddur”.
- Bu amillər nələrdir?
- Məsələn, istehsalın bərpası üçün proqnozlar hələ çox da ürəkaçan deyil, koronavirusun təsiri var. Nəqliyyatın, müəssisələrin işində yeni məhdudiyyətlərin olması mümkündür. Bu, neftin ucuzlaşmasına gətirib çıxara bilər.
Əlavə olaraq OPEC + -da iştirak etməyən bəzi “biletsiz” ölkələrdə (ABŞ, Qayana, Norveç, Böyük Britaniya, Kanada, Braziliya), iştirak edən, lakin faydaları olan (İran, Liviya) və ya sadəcə utanmadan qaydaları pozan (Nigeriya, İraq) ölkələrdə neft hasilatının artmasına işarə etmək olar.
Ayrıca olaraq hasilatı sutkada 2 milyon barelə çatdıracağını vəd edən İranı göstərə bilərik. Yeri gəlmişkən, ABŞ Prezidenti Co Bayden seçildikdən sonra, o, Donald Tramp olmadığını göstərmək üçün Tehranla bir müqavilə imzalaya bilər.
Bu istisna deyil. Məhz bu, qiymətlərin enməsinə səbəb ola bilər. Bütün bunları nəzərə alsaq, bir barel üçün 40-43 dollar qiymətləndirmə hələ ən bədbin ssenari deyil.