Dek
2021
14:56
131
20
992
Virtual karabakh

Dohada Azərbaycan-Qətər dostluq əlaqələrini təcəssüm etdirən “Qardaşlıq” monumentinin açılışı olub - FOTO

Dekabrın 5-də Qətərin paytaxtı Doha şəhərində Azərbaycan-Qətər dostluq əlaqələrini təcəssüm etdirən “Qardaşlıq” adlı monumentin açılış mərasimi baş tutub.

Qətərin ən böyük və ən çoxölçülü mədəniyyət layihəsi hesab olunan “Katara” Mədəniyyət Şəhərciyinin çoxsaylı ziyarətçi qəbul edən guşəsində yerləşdirilmiş monument Azərbaycan Respublikasının Qətər Dövlətindəki Səfirliyinin təşəbbüsü ilə azərbaycanlı heykəltəraş Novruz Musayev tərəfindən hazırlanıb.

Monumentin açılış mərasimində Azərbaycan Respublikasının mədəniyyət nazirinin birinci müavini Elnur Əliyev, “Katara” Mədəniyyət Şəhərciyi Fondunun baş direktoru Xalid Əl-Suleyti, Azərbaycan Respublikasının Qətər Dövlətindəki fövqəladə və səlahiyyətli səfiri Rəşad İsmayılov, həmçinin Qətərdə akkreditə olunmuş diplomatik nümayəndəliklərin rəhbərləri və təmsilçiləri, yerli ictimaiyyət nümayəndələri, Qətərdəki Azərbaycan icmasının üzvləri və media mənsubları qatılıblar.

Səfir Rəşad İsmayılov və Azərbaycan Respublikasının mədəniyyət nazirinin birinci müavini Elnur Əliyev tədbirdə çıxış ediblər və ardınca monumentin rəsmi açılışı baş tutub.

Bürüncdən hazırlanmış sənət əsəri bir tərəfində müasir Bakının gözoxşayan memarlıq incilərindən biri olan Heydər Əliyev Mərkəzi, digər tərəfində isə “Katara” Mədəniyyət Şəhərində yerləşən “Amfiteatr”ın işləndiyi ağac formasındadır. Sənət əsərinin gövdəsinə həkk olunmuş aypara ornamenti Azərbaycan və Qətərin eyni kökə - İslam mədəniyyətinə mənsub olduğuna işarə edir. Heykəlin üzərindəki sferik obyekt iki ölkənin əsas təbii ehtiyatları olan neft və qazı simvollaşdırır.

Tədbir Qətər kütləvi informasiya vasitələrində və yerli mediada geniş işıqlandırılıb.

Açılış mərasimindən öncə Azərbaycan Respublikasının mədəniyyət nazirinin birinci müavini Elnur Əliyev və “Katara” Mədəniyyət Şəhərciyi Fondunun baş direktoru Xalid Əl-Suleyti arasında nümayəndə heyətlərinin iştirakı ilə görüş baş tutub. Görüşdə mədəniyyət sahəsində əlaqələrin inkişaf yolları müzakirə olunub.

Məlumat üçün bildirək ki, “Katara” Mədəniyyət Şəhərciyi Qətərin özündə teatr və konsert zalları, sərgi mərkəzləri, musiqi akademiyası, incəsənət mərkəzləri, ticarət və ictimai iaşə obyektləri, eləcə də istirahət yerlərini əhatə edən ən məşhur turizm məkanlarından biri hesab olunur.

Daha öncə Azərbaycan Respublikasının Qətər Dövlətindəki Səfirliyinin təşəbbüsü ilə, 2021-ci ilin sentyabr ayında mədəni irsin təşviqi, birgə elmi-mədəni tədqiqatların, sərgi-ekspozisiyaların, simpoziumların, təbliğat-təşviqat tədbirlərinin təşkili istiqamətində əməkdaşlığın həyata keçirilməsi və bununla da Azərbaycan Respublikası və Qətər Dövləti arasında mədəni əlaqələrin daha da inkişaf etdirilməsinə töhfə verilməsi məqsədi ilə “İçərişəhər” Dövlət Tarixi Memarlıq Qoruğu İdarəsi və “Katara” Mədəniyyət Şəhərciyi Fondu arasında anlaşma memorandumu imzalanıb.

Bizimlə əlaqə saxlayın

Digər Siyasət xəbərləri