14 
İyl
2022
14:49
56
20
553
Virtual karabakh

Gürcüstanın Kvemo Kartli regionunun qubernatoru Diasporla İş üzrə Dövlət Komitəsində olub

14 İyl, 2022
14:49
553

Gürcüstanın Kvemo Kartli regionunun qubernatoru Diasporla İş üzrə Dövlət Komitəsində olub

Diasporla İş üzrə Dövlət Komitəsinin (DİDK) sədr müavini Vaqif Seyidbəyov Gürcüstanın Kvemo Kartli regionunun qubernatoru Giorgi Doxturişvilinin rəhbərlik etdiyi nümayəndə heyəti ilə görüşüb.

Qonaqları salamlayan sədr müavini komitənin tarixi və fəaliyyət istiqamətləri, xaricdə yaşayan azərbaycanlıların Vətənlə əlaqələrinin gücləndirilməsi üçün görülən işlər barədə ətraflı məlumat verib. Ulu öndər Heydər Əliyev tərəfindən yaradılan Dövlət Komitəsinin bu günlərdə 20 illik yubileyinin tamam olduğunu deyən V.Seyidbəyov bu əlamətdar tarixin işğaldan azad olunmuş Qarabağda Azərbaycan əsgərləri ilə birlikdə qeyd olunduğunu söyləyib. O, Gürcüstanda yaşayan azərbaycanlıların gürcü dilini bilmələrinin vacibliyindən söz açaraq, bu istiqamətdə həyata keçirilən layihələrdən də danışıb.

Səmimi qəbula görə təşəkkür edən G.Doxturişvili Diasporla İş üzrə Dövlət Komitəsinin yaradılmasının 20 illiyi münasibətilə təbriklərini çatdırıb. O, iki ölkə arasında dostluq münasibətlərinin əsrlər boyu davam edən mehriban qonşuluq münasibətləri üzərində qurulduğunu söyləyib.

Rəhbərlik etdiyi Kvemo Kartli regionunda yaşayan azərbaycanlıların Gürcüstan cəmiyyətinə inteqrasiyası üçün gürcü dilini bilmələrinin vacibliyi ilə bağlı fikirlərə şərik olduğunu bildirən qubernator qeyd edib ki, onun təşəbbüsü ilə hər bir məktəbdə gürcü dili kursları açılıb. DİDK-nın həyata keçirdiyi layihələri yüksək qiymətləndirdiyini vurğulayan G.Doxturişvili Dövlət Komitəsinin rəhbərliyini qarşılıqlı maraq doğuran məsələlərin müzakirəsi üçün Gürcüstana səfərə dəvət edib.

Qeyd edək ki, Gürcüstanda soydaşlarımızın kompakt yaşadığı bölgələrdə - Tbilisi şəhərində “Alyans” Gənclər Mərkəzi, Marneuli rayonunda Gürcüstan Azərbaycanlılarının İnteqrasiya Mərkəzi, Qardabani rayonunda Qardabani Gənclər Mərkəzi, Bolnisi rayonunda “Qafqaz Hüquq və İnteqrasiya Mərkəzi” və digər mərkəzlər tərəfindən DİDK-nın dəstəyi ilə Azərbaycan dili, tarixi, ədəbiyyatı və gürcü dilinin tədrisi ilə yanaşı, bir sıra mühüm layihələr də həyata keçirilir. Bundan başqa, hüquqi problemlərlə qarşılaşan soydaşlarımız Tbilisidə komitənin dəstəyi ilə fəaliyyət göstərən “Qanun” Hüquqi Yardım Mərkəzinə müraciət edərək, təmənnasız hüquqi yardım almaq imkanına da malikdirlər.

Bizimlə əlaqə saxlayın

Digər Siyasət xəbərləri