​​​​​​​Azərbaycanda sosial müdafiə və sosial təminat xərcləri azaldılır

Azərbaycanın 2023-cü il üzrə dövlət büdcəsindən sosial müdafiə və sosial təminatla bağlı ayırmalar 99,944 milyon manat və yaxud 2,3% azaldılaraq 4 milyard 415,877 milyon manatdan 4 milyard 315,933 milyon manata endirilir.

“Report” xəbər verir ki, bu, “2023-cü il dövlət büdcəsi haqqında” qanuna dəyişikliklərlə bağlı qanun layihəsində öz əksini tapıb.

Sənədə əsasən, sosial müdafiə xərclərinin dəyişdirilməyərək 320,557 milyon manat, sosial təminat xərclərinin də dəyişdirilməyərək 5,64 milyon manat, sosial müdafiə və sosial təminat sahələri üzrə tətbiqi tədqiqat xərclərinin də dəyişdirilməyərək 50 milyon manat saxlanılması, sosial müdafiə və sosial təminat sahələri üzrə digər müəssisə və tədbirlər üzrə xərclərin isə 99,944 milyon manat və yaxud 2,4% azaldılaraq 4 milyard 089,629 milyon manatdan 3 milyard 989,685 milyon manata endirilməsi nəzərdə tutulub.