İndoneziya mətbuatında Xocalı soyqırımı haqda məqalə dərc olundu

İndoneziyanın nüfuzlu akurat.co informasiya agentliyində Xocalı soyqırımı ilə bağlı məqalə yayımlanıb.

Oxu.Az xəbər verir ki, “Xocalı soyqırımı: Bəşəriyyətə qarşı cinayət” sərlövhəli məqalədə Xocalı soyqırımının son illərdə bəşəriyyətin gördüyü ən dəhşətli qətliam olduğu vurğulanır.

Yazıda həmçinin bildirilir ki, bu hadisə insanlığa, bəşəriyyətə qarşı ağır cinayətdir: “Bütün dünyanın Xocalıda baş verənlərdən xəbərdar olması zəruridir ki, bir daha bu cür dəhşətli hadisələr təkrarlanmasın. Ona görə də Xocalı soyqırımına təkcə ermənilərin azərbaycanlılara qarşı qətliamı kimi yanaşmaq doğru deyil. Xocalı soyqrımı bütün insanlığa qarşı yönələn cinayətdir və bütün dünya buna hüquqi və siyasi qiymətini verməlidir”.

Məqalədə həmin dönəmdə Xocalı soyqırımının dəhşətlərini izləyən və qələmə alan dünyaca məşhur “Vaşinqton Post”, “Nyu-York Taymz”, “Sandi Taymz”, “Taymz” kimi nəşrlərə istinad edilir. Eyni zamanda bildirilir ki, Xocalı soyqırımı nəticəsində 63-ü uşaq, 106-sı qadın, 70-i qoca və qarı olmaqla, 613 Xocalı sakini qətlə yetirilib, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib.

Düşmən gülləsindən 76-sı uşaq olmaqla, 487 nəfər yaralanıb. 1275 nəfər əsir götürülüb. Əsir götürülənlərdən 150 nəfərinin, o cümlədən 68 qadın və 26 uşağın taleyi bu günədək məlum deyil. Həmçinin qeyd edilirki, bütün bu vandallığı erməni silahlı birləşmələrinə komandanlığı Ermənistanın sabiq prezidentləri Robert Koçaryan və Serj Sarqsyan ediblər:

“Və çox təəssüf ki, hələ də cəzasızdırlar. Bəşəriyyətə qarşı yönələn bu cinayətin bir daha təkrarlanmamasını arzu edirik. Buna görə də, dünyanın müxtəlif öılkələrində fəaliyyət göstərən həmkarlarımızı bu soyqırım aktının daha çox işıqlandırmalarına və ədalətin öz yerinə tapmasına dəstək vermələrinə çağırırıq...”.