Bu gün Bakıda “InMerge” İnnovasiya Sammiti işinə başlayır - FOTO
Bu gün Bakıda “InMerge” İnnovasiya Sammiti işinə başlayır - FOTO
Bu gün Bakıda “InMerge” Innovation Summiti işinə başlayır.
Üçüncü ildir ölkəmizdə keçirilən sammit dünyanın aparıcı texnologiya şirkətlərini, bu sahənin liderlərini, startapları və innovatorları bir araya gətirir. Layihənin məqsədi innovasiya texnologiyaları sahəsindəki yenilikləri bölüşmək, güclü əlaqələr yaratmaq və sahənin ölkəmizdəki inkişafına təkan verməkdir.
Sammitdə elektron ticarətin uğurlu şirkətlərindən biri “Trendyol Group”un prezidenti Çağlayan Çetin, məşhur TED spikeri Maykl Ringel, “Shazam”ın təsisçisi Kris Barton kimi bir çox beynəlxalq ekspertlər iştirak edəcəklər. “InMerge” Innovation Summitinin qonaqlarından biri də “Apple” şirkətinin qurucularından olan məşhur kompüter mühəndisi Stiv Voznyak olacaq. O, innovasiyalar sahəsindəki son yeniliklərdən, şəxsi layihələrindən danışacaq.
Tədbirdə Azərbaycan Respublikasının iqtisadiyyat naziri Mikayıl Cabbarov, rəqəmsal inkişaf və nəqliyyat naziri Rəşad Nəbiyev, “PAŞA Holding”in Baş icraçı direktoru Cəlal Qasımov, “Kapital Bank”ın İdarə Heyətinin sədri, Baş icraçı direktor Fərid Hüseynov öz fikirlərini və təcrübələrini bölüşəcəklər.
“PAŞA Holding”in təşkilatçılığı ilə keçirilən sammitdə elektron ticarət, sığorta texnologiyaları, süni intellekt, telekommunikasiya və bir çox mövzuda təqdimatlar ediləcək, müzakirələr və seminarlar baş tutacaq.
Bakı Konqres Mərkəzində keçirilən tədbir dekabrın 1-də də davam edəcək.
Daha çox foto burada: PhotoStock.az