Avropa Konfrans Liqası: Azərbaycanın üç klubunun rəqibi müəyyənləşdi - YENİLƏNİB

“Qarabağ” avrokuboklarda mübarizəyə İsrailin “Aşdod” klubu ilə başlayacaq. “Keşlə” ilk mərhələdə Rusiyanın “Soçi” komandası ilə, “Sumqayıt” isə Serbiyanın “Çukariçki” klubu ilə qarşılaşacaq.

“Qarabağ” ilk matçını evdə, “Keşlə” və “Sumqayıt” isə müvafiq olaraq Soçi və Belqrad şəhərlərində keçirəcək.

15:43

Azərbaycan çempionu “Neftçi”nin Avropa Konfrans Liqasının II təsnifat mərhələsindəki potensial rəqibləri müəyyənləşib.

Oxu.Az xəbər verir ki, Çempionlar Liqasının I raundunda Gürcüstan çempionu “Dinamo” (Tbilisi) ilə qarşılaşacaq “ağ-qaralar” məğlub olacağı təqdirdə, Konfrans Liqasının Çempionlar yolunda mübarizəni davam etdirəcək.

Belə olarsa, Samir Abasovun yetirmələri bu turnirdə “Makkabi” (Hayfa, İsrail) – “Kayrat” (Qazaxıstan) cütünün məğlubu ilə qarşılaşacaq. “Neftçi” ilk matçını evdə keçirəcək.

Qeyd edək ki, Konfrans Liqasında II təsnifat mərhələsinin oyunları iyulun 22-də və 29-da keçiriləcək.

10:04

Bu gün İsveçrənin Nyon şəhərində UEFA Konfrans Liqasının II təsnifat mərhələsinin püşkü atılacaq.

Oxu.Az xəbər verir ki, püşkatma mərasimində Azərbaycan Premyer Liqasının üç klubunun – “Qarabağ”, “Sumqayıt” və “Keşlə”nin rəqibləri bilinəcək. 

Mərasim Bakı vaxtı ilə 15:30-da başlayacaq. 

UEFA püşkdən əvvəl komandaları qruplara bölüb. I səbətdə yer alan “Sumqayıt”ın mümkün rəqibləri Kiprin “Apollon”, İsrailin “Hapoel” (Beer-Şeva), Serbiyanın “Çukariçki”, Rumıniyanın “Styaua” və Ukraynanın “Vorskla” klublarıdır.

II səbətdəki “Keşlə” Kiprin AEL, Türkiyənin “Sivasspor”, Rusiyanın “Soçi”, Qazaxıstanın “Astana”, İsrailin “Makkabi” (Təl-Əviv) klublarından biri ilə görüşəcək.

VI səbətdəki “Qarabağ” isə nisbətən zəif komandalarla qarşılaşmaq şansına malikdir. Ağdam təmsilçisi “Velej” (Bosniya və Herseqovina) – “Kolreyn” (Şimali İrlandiya), “Payde” (Estoniya) – “Şlyonsk” (Polşa), “Laçi” (Albaniya) – “Buduçnost” (Monteneqro) cütlərinin qalibi və İsrailin “Aşdod”, həmçinin Bolqarıstanın “Lokomotiv” (Plovdiv) klublarından biri ilə qarşılaşacaq.

Qeyd edək ki, Konfrans Liqasında II təsnifat mərhələsinin ilk oyunları iyulun 22-də, cavab görüşləri isə bir həftə sonra olacaq.