Ramil Quliyev: “Səni sevirəm, Azərbaycan!” - VİDEO

“Bütün yarışlar çox yaxşı gedir. Hər şey vaxtında olur. Burada şərait çox yaxşıdır. Olimpiya Kəndində təşkilatçılıq yüksək səviyyədədir”.

Oxu.Az xəbər verir ki, bunu Tokio-2020 Yay Olimpiya Oyunlarında Türkiyəni təmsil edən azərbaycanlı sprinter Ramil Quliyev deyib.

31 yaşlı idmançı Milli Olimpiya Komitəsinin feysbuk səhifəsinə açıqlamasında məqsədlərinin 2024-cü ildə Fransada keçiriləcək Olimpiadaya hazırlaşmaq olacağını söyləyib: “Olimpiada ilə yarışlarımız yekunlaşmır. Türkiyədə klubların yarışları olacaq. Qarşıdakı illərlə bağlı daha bir hədəfimiz var – Paris-2024 Yay Olimpiya Oyunları. Bütün idmançılarımıza ən yaxşı nəticələrini göstərməyi arzu edirəm”.

Quliyev sonda Azərbaycana salam göndərməyi də unutmayıb: “Salam, Azərbaycan, səni sevirəm!”

Qeyd edək ki, Olimpiadanın yarımfinal mərhələsində 200 m məsafəyə qaçışda finişə altıncı yerdə çatan Ramil Quliyev finala yüksələ bilməyib.