20 
May
2022
17:09
80
13
783
Virtual karabakh

İki illik fasilədən sonra keçirilən yarışın açılış mərasimi olub - FOTO/VİDEO

20 May, 2022
17:09
783

İki illik fasilədən sonra keçirilən yarışın açılış mərasimi olub - FOTO/VİDEO

Kikboksinq üzrə XXVI Azərbaycan çempionatının açılış mərasimi keçirilib.

Oxu.Az-ın xəbərinə görə, yarışdan öncə iştirakçı klubların idmançılarının iştirakı ilə parad təşkil olunub və Azərbaycan himni səsləndirilib.

Daha sonra söz Azərbaycan Kikboksinq Federasiyasının (AKF) prezidenti Orxan Əliyevə verilib. O, yerli kikboksçuların hətta pandemiya şəraitində də yüksək nəticələr göstərdiklərini bildirib. O.Əliyev Azərbaycan çempionatında fərqlənənlərin V İslam Həmrəyliyi Oyunlarında çıxış edəcəklərini vurğulayıb.

AKF prezidenti 44 günlük Vətən müharibəsində Azərbaycan kikboksçularının da qəhrəmancasına vuruşduqlarını söyləyərək, dünyasını dəyişən bütün şəhidlərin xatirələrinin bir dəqiqəlik sükutla yad olunmasını xahiş edib.

Onun ardından çıxış edən gənclər və idman naziri Fərid Qayıbov və Milli Olimpiya Komitəsinin vitse-prezidenti Çingiz Hüseynzadə pandemiyadan sonra qapalı məkanda belə bir yarışın keçirilməsini bayram adlandırıblar.

Milli Məclisin İdman Komitəsinin rəhbəri, AKF-nin fəxri prezidenti və İdarə Heyətinin sədri Adil Əliyev isə tədbirdə iştirak edən bütün şəhid ailələrini və qaziləri salamlayaraq, qələbənin qazanılmasında rolu olanlara təşəkkürünü bildirib. A.Əliyev iki illik fasilədən sonra ölkədə kütləvi tədbirlərin keçirilməsinə razılığın verilməsini sevindirici hal adlandırıb:

“Biz müzəffər xalqın övladlarıyıq, bununla fəxr edirik. Qarşıda daha böyük yarışlar gözlənilir. Ümidvaram ki, idmançılarımız Türkiyədə keçiriləcək İslamiadada bir daha bizi sevindirəcəklər. Çünki güclü, qalib xalq olduğumuzu hamı gördü. Hər birimizin borcudur ki, Azərbaycanda idmanın inkişafına gücümüz çatdığı qədər dəstək olaq. Məhz Azərbaycanda gənclər, idman siyasəti və ordu quruculuğunun başlandığı vaxt dünyaya göz açan övladlarımız bizə qələbə bəxş etdilər. Hər birimizin borcu budur ki, bu siyasəti dəstəkləyək və irəli aparaq”.

Daha sonra fəxri prezident Fərid Qayıbov və Bakı şəhər Gənclər və İdman Baş İdarəsinin rəisi Raqif Abbasov XXVI Azərbaycan çempionatının keçirilməsinə verdikləri yüksək dəstəyə görə mükafatlandırılıblar.

Həmçinin, 44 günlük Vətən müharibəsinin şəhidləri -  Muxtar Qasımlı, Şıxamir Qaflanov, Kərəm Veyisov, Pərvin Əlizadə və Xudayar Yusifzadənin ailə üzvləri plaketlərlə təltif olunublar.

Ardınca kikboksçu Anar Məmmədova ötən ilin sonlarında İtaliyada qazandığı dünya çempionluğu münasibətilə “Şkoda Rapid” avtomobilinin açarı hədiyyə olunub.

Daha sonra bədii hissəyə keçilib. Əməkdar artist Ədalət Şükürov, Vüqar Muradov, Səlim Abbasov və Coşqun Viləş kimi musiqiçilər ifa etdikdən sonra yarış davam etdirilib.

Qeyd edək ki, Azərbaycan çempionatına mayın 22-də yekun vurulacaq. “Low kick” və “Full Contact” versiyaları üzrə keçirilən yarışın qalibləri Azərbaycanı avqustda Konyada keçiriləcək V İslam Həmrəylik Oyunlarında təmsil edəcəklər.

Səbuhi Musa

Bizimlə əlaqə saxlayın

Digər İdman xəbərləri