Benzema futbol üzrə dünya çempionatını buraxacaq - YENİLƏNİB

İspaniyanın "Real" futbol komandasının və Fransa yığmasının hücumçusu Kərim Benzema zədə səbəbindən dünya çempionatında iştirak edə bilməyəcək.

Bu barədə bazar günü Fransa Futbol Federasiyasının mətbuat xidməti məlumat yayıb.

Benzema əzələləri zədələndiyi üçün şənbə günü komandanın məşqini tərk etmək məcburiyyətində qalıb.

"Bu dünya çempionatının karyerasında əsas məqsədi olan Kərimə təəssüf edirəm. Fransa millisi üçün bu itkiyə baxmayaraq, mən öz komandama güvənirəm. Bu böyük sınaqdan tab gətirmək üçün hər şeyi edəcəyik", - Fransa millisinin baş məşqçisi Didye Deşam açıqlama verib.

Xatırladaq ki, Pol Poqba (“Yuventus”) və Nqolo Kante (“Çelsi”) də zədə səbəbindən Fransa yığmasının tərkibində dünya çempionatında iştirak edə bilməyəcək.

00:15

Fransa millisinin hücumçusu Kərim Benzemanın DÇ-2022-də iştirakı sual altına düşüb.

Məlumata görə, futbolçu əzələ zədəsi səbəbindən noyabrın 22-də Avstraliya ilə keçiriləcək oyunda iştirak etməyəcək. O, məşq zamanı sol qvadriseps nahiyəsində kəskin ağrı hiss edib.

Bildirilir ki, futbolçu MRT müayinəsindək keçəcək. Bununla da zədənin xarakteri və şiddəti aydınlaşacaq. Lakin ilkin məlumatlar Benzemanın Qətərdəki turniri buraxma ehtimalının olduğunu göstərir.

Qeyd edək ki, bu mövsüm “Qızıl Top”un sahibi olan Benzema “Real Madrid”in heyətində La Liqada 7 oyuna çıxıb və 5 qol vurub.

Mənbə: sports.ru