Sabirabadda qəribə kriminal hadisə baş verib. Narkotik vasitəsinin oğurlandığına dair polisə şikayət edən şəxs hamını təəccübləndirib.
Rayonun Muğangəncəli kənd sakini, 1977-ci il təvəllüdlü Abıyev Elnur Abı oğlu həmkəndlisi, 1982-ci il təvəllüdlü Tariyel İmanovun evinə gələrək ondan 100 qram narkotik vasitə olan qurudulmuş marixuananı 600 manata alıb.
Oxu.Az APA TV-yə istinadən xəbər verir ki, Tariyel İmanov daha sonra polisə zəng edərək, evindən narkotik vasitənin oğurlandığını bildirib.
Belə ki, Tariyel İmanov istintaqa deyib ki, həmin gecə Elnur Abıyevə satmış olduğu 100 qram narkotik vasitədən qazandığı 600 manat pul və evində qalan 250 qram marixuana, eləcə də, əlavə 2 200 manat pul və tərəzi oğurlanıb.
Müstəntiq Yavər Eyvazov deyib ki, araşdırma zamanı Elnur Abıyevin evindən ümumi çəkisi 9,84 qram narkotik vasitə olan qurudulmuş marixuana aşkar edilərək götürülüb.
Hazırda hər iki şəxsə qarşı cinayət işi açılıb, barələrində həbs qəti-imkan tədbiri seçilib. Oğurlanan pul və narkotik vasitənin tapılması istiqamətində araşdırma aparılır.
www.oxu.az
