Dünən, Tbilisidə keçirilən “Dinamo” (Gürcüstan) – “Qəbələ” (Azərbaycan) matçından sonra gürcü futbol azarkeşləri Azərbaycan komandasının azarkeşlərinə hücum edərək, həmyerlilərimizi döyüblər.
Oxu.Az xəbər verir ki, bu barədə Facebook-dakı şəxsi səhifəsində Azərbaycanın “Şahdağ” futbol klubunun mətbuat katibi Rüstəm Əzimov yazıb.
Gürcü azarkeşlər azərbaycanlı azarkeşlərdən Azərbaycan bayraqlarını alaraq, onları ayaqlar altına atıb və tapdalayıblar.
R.Əzimov həmçinin öz səhifəsində həmin hadisəni əks etdirən fotoşəkili paylaşıb.
Qeyd edək ki, bu, dünənki matçda baş vermiş ilk insident deyil.
Belə ki, həmin matçda gürcü fanatları üzərində “Biz 1921-ci ildə Zaqatala və Qaxı xatırlayırıq” yazısı olan plakat asıblar.
Həmin plakat yalnız UEFA rəsmilərinin müdafiləsindən sonra götürülüb.
Xatırladaq ki, bu, artıq ilk belə hal deyil.
Belə ki, 2014-cü iyulun 31-i Avropa Liqasının 3-cü təsnifat mərhələsi çərçivəsində Bakıda - “Bakcell Arena” stadionunda keçirilən “Neftçi” – “Çixura” (Gürcüstan) oyununda da buna bənzər insident yaşanmışdı.
Tribunada gürcü klubunun azarkeşləri Zaqatala və Qax rayonlarını Gürcüstan ərazisi kimi təsvir edən plakat qaldırılmışdılar.
