“ADAMI” media mükafatları “ən yaxşı”ları seçməyə hazırlaşır
“ADAMI” media mükafatları “ən yaxşı”ları seçməyə hazırlaşır
Şərqi Avropada mədəniyyət müxtəlifliyini xarakterizə edən “ADAMI” media mükafatları üçün ərizə qəbuluna start verilib.
Oxu.Az xəbər verir ki, bu il mükafat artıq üçüncü dəfədir ki, öz qaliblərini tapacaq.
Müsabiqədə Avropa Birliyinin Şərqi Avropa partnyorluğu layihəsində iştirak edən ölkələrin (Azərbaycan, Belarus, Gürcüstan, Ermənistan, Moldova, Ukrayna) telekompaniyaları, prodüser mərkəzləri, jurnalistlər, media nümayəndələri və rejissorları iştirak edə bilərlər.
“ADAMI” mükafatı ən yaxşı televiziya proqramları, verilişləri, bədii və sənədli filmlərin ərsəyə gətirilməsində əməyi olanlara verilir. Burada əsasən, insanların azad həyatı, etnik mənsubiyyəti, müxtəlif dinlər, ənənələr barədə olan proyektlərə üstünlük veriləcək.
Müsabiqə zamanı altı nominasiya üzrə pul mükafatları öz sahibini gözləyir. Bundan əlavə, rus, ingilis, fransız dilini bilən iştirakçılar üçün Almaniyanın Deutshe Welle (Berlin, Almaniya), MDR (Leypziq, Almaniya), ARTE (Strasburq, Fransa) kanallarında təcrübə keçmək şansı yaranacaq. Materialların qəbulu 1 iyul tarixindən 1 oktyabr tarixinədək davam edəcək.
Qeyd edək ki, bütün xərclər mükafatlandırma mərasiminin təşkilatçıları tərəfindən qarşılanacaq.
Pərviz Hüseyn
www.oxu.az