27 
Yan
2021
21:06
570
32
3935
Virtual karabakh

Vətən müharibəsinin malakan döyüşçüləri ilə görüş keçirilib - FOTO

İsmayıllı rayonunun İvanovka kəndində Vətən müharibəsinin iştirakçıları ilə görüş keçirilib.

Bu barədə İsmayıllı Rayon İcra Hakimiyyəti məlumat yayıb. 

Bildirilib ki, tədbirdə RİH-nin başçısı, icra hakimiyyətinin əməkdaşları və Nikitin adına kolxozun əməkdaşları iştirak edib.

Rayon rəhbərliyi görüş zamanı bildirib ki, Vətən müharibəsində ölkəmizin digər azsaylı xalqları ilə yanaşı, rus (malakan) icması da fədakarlıq və rəşadət göstərib, torpaqlarımızın azadlığı uğrunda mübarizə aparıblar. Vətən müharibəsində iştirak edən beş nəfər döyüşçü tərxis olunub, hazırda üç nəfər malakan sakinimiz isə Milli Orduda xidmətini davam etdirir.

Malakan döyüşçülərinin İkinci Qarabağ müharibəsində göstərdikləri qəhrəmanlıqdan hələ çox danışılacağını qeyd edən rayon rəhbəri xatırladıb ki, arxa cəbhədə də İvanovka kəndinin sakinləri orduya dəstək aksiyaları keçirərək, ön cəbhəyə yardım göndərilməsində könüllü iştirak ediblər.

Eyni zamanda, qeyd edək ki, İkinci Qarabağ müharibəsində İvanovka kəndindən bir nəfər sakinimiz də şəhidlik zirvəsinə ucalıb. Allahdan onun yaxınlarına səbr arzulayırıq.

Vətən müharibəsi iştirakçıları da öz döyüş təəssüratlarından və keçdikləri zəfər yolundan danışıblar. Səmimi keçən görüşdə döyüşçülər uzun illərdən bəri düşmən tapdağı altında qalmış torpaqlarımızın Azərbaycan Respublikasının Prezidenti, Müzəffər Ali Baş Komandan İlham Əliyevin uzaqgörən siyasəti və rəhbərliyi sayəsində azad edildiyini, bu yolda canlarından keçmiş şəhidlərimizin xatirəsinin daim əziz tutulduğunu diqqətə çatdırıblar.

Həmçinin müharibədə baş verən xatirələrindən söz açaraq qeyd ediblər ki, doğulub böyüdükləri, özlərinə vətən bildikləri Azərbaycan torpaqlarına biganə qalmayıb könüllü döyüşlərdə iştirak ediblər. Bildiriblər ki, ermənilər güclü Azərbaycan ordusunu qarşılarında gördükdə mövqelərini tərk edərək qorxaq kimi qaçırdılar.

Rayon İcra Hakimiyyətinin başçısı görüşdə bildirib ki, dövlət tərəfindən şəhid və qazilərimizin ailələlərinə daim diqqət və qayğı ilə yanaşılır. Hazırda döyüşçülərimizin hər hansı bir problemləri varsa, həll etməyə hazır olduğunu RİH başçısı bildirib. 

Döyüşçülər də öz növbəsində problemlərinin olmadığını, kolxozda işləmək istədiklərini, digərləri isə Bakıda və kolxozda işlədiklərini bildiriblər. Yaradılan şəraitə və göstərilən diqqətə görə dövlət başçısı cənab İlham Əliyevə və ölkənin Birinci vitse-prezidenti Mehriban Əliyevaya minnətdarlıqlarını bildiriblər.

Məlumat üçün bildiririk ki, multikultiralizmliyi və tolerantlığı ilə dünyaya nümunə olan Azərbaycanın ən multikultural rayonlarından biri də İsmayıllı rayonudur. Burada bir neçə azsaylı xalq bir-biri ilə yaxın qonşuluq, səmimi dostluq şəraitində yaşayır.

Bizimlə əlaqə saxlayın

Digər Cəmiyyət xəbərləri