Oxçuçayın çirkləndirilməsinin qarşısını almaq üçün işlərə başlanılıb

“Ekologiya və Təbii Sərvətlər Nazirliyi, digər aidiyyəti qurumlar Ermənistanın Oxçuçayı çirkləndirmə səviyyəsini azaltması ilə bağlı əməli işlərə başlayıb”.

Oxu.Az-ın məlumatına görə, bunu jurnalistlərə açıqlamasında ekologiya və təbii sərvətlər nazirinin müavini Vüqar Kərimov bildirib.

Onun sözlərinə görə, Ermənistan ərazisindən keçib gələn dörd çayımız var:

“Bunlar Bərgüşad, Oxçuçay, Bəsitçay və Araz çayıdır. Araz çayı İran və Ermənistan ərazilərindən keçməklə gəlir. Bu çayların içərisində çirklənməsinə görə kritik vəziyyətdə olan Oxçuçaydır. ETSN və digər aidiyyəti qurumlar Ermənistanın çayı çirkləndirməsini azaltması ilə bağlı işlərə başlayıb”.

“Çayların çirkləndirilməsinin dayandırılması vacib məsələdir. Çünki ora qayıdan əhalinin təmiz su ilə təminatı dövlətin öhdəliyidir”.

İlhamə Əbülfət