24 
Sen
2022
17:47
25
220
2383
Virtual karabakh

“Space” TV-nin direktoru: “Bəzi arzu etmədiyimiz verilişləri də repertuara daxil edirik” – MÜSAHİBƏ

24 Sen, 2022
17:47
2383

“Space” TV-nin direktoru: “Bəzi arzu etmədiyimiz verilişləri də repertuara daxil edirik” – MÜSAHİBƏ

“Bir çox özəl kanallar kimi, “Space” TV də sırf reklam bazarına bağlı olan kanaldır. Bizi davamlı olaraq maliyyə ilə təmin edən əlavə bir mənbə yoxdur”.

Bu sözləri Bizim.Media-ya verdiyi müsahibədə “Space” TV-nin direktoru, Əməkdar incəsənət xadimi Müşfiq Hətəmov söyləyib. 

- Müşfiq bəy, artıq bir il olar ki, “Space” Teleradio Yayım Şirkətinə rəhbərlik edirsiniz. Kanalın iflasa doğru getdiyi bir vaxtda rəhbərliyə gəldiniz. Hazırda vəziyyət necədir?

- Mən “Space” şirkətinə rəhbərliyə gələndə qarşımda öz həllini gözləyən üç əsas məsələ durmuşdu: Antiböhran addımları atmaq, texniki-maliyyə problemlərin həll edilməsi və yeni layihələrin hazırlanması. Amma burada bəzi məsələlər də var ki, onları xatırlatmasam, olmaz. Kanalın ümumi reytinqini qaldırmaqla yanaşı, kommersiya şirkəti olduğumuzu da unutmamalıyıq. İzləyici kütləmizin istəyinə uyğun olaraq bəzi arzu etmədiyimiz verilişləri də repertuara daxil edirik. Bu bir il ərzində çox riskli və ciddi addımlar atdıq. İndi məqsədlərimizlə bağlı ikinci mərhələyə qədəm qoymuşuq. Tamaşaçılarımız efirdə yeni formatda verilişlər izləyə biləcəklər. Maliyyə məsələlərimizi stabilləşdirəcəyik. “Space” kanalı hazırda öz ayaqları üzərində dura bilir. İnanıram ki, izləyicilərimiz qarşılarında onların dəyərlərini yüksək tutan yeni proqramlarımızdan dolayı sevinəcəklər.

Bu gün tarixdə ilk dəfədir ki, Azərbaycanda televiziyalar bu qədər çoxdur və onlar arasında keyfiyyət uğrunda rəqabət başlayıb. Bu məni çox sevindirir. Çalışacağıq ki, bu rəqabətdə özümüzü təsdiq edək, çünki qarşımızda çox böyük rəqiblərimiz var. Kanalın formatının dəyişməsi məsələsi də planlarımız arasındadır. Həmçinin “Space” çalışacaq ki, beynəlxalq platformalara da çıxsın. Bu gün 21-ci əsrin əsas tələbi rəqəmsallaşma və audiovizual təsir imkanıdır. Bu hətta kitabları da, mətbuatı da üstələyir. Biz bunu nəzərə alaraq mütəmadi məsləhətləşmələr aparırıq və audiovizual siyasətimizi daha düzgün şəkildə qurmağa çalışırıq. 

- Rəqiblərinizdən və rəqabətdən danışdınız. Yüksək maliyyə mənbəyi olan kanallarla rəqabət aparmaq sizi qorxutmur ki?

-  Bizi davamlı olaraq maliyyə ilə təmin edən əlavə bir mənbə yoxdur. Hazırda sırf reklam bazarına bağlı olan kanalıq. Lakin mən inanıram ki, mümkün imkanlarımız daxilində də biz uğurlu işlər ortaya qoya biləcəyik. 

- Rəhbərliyə gəldiyiniz ilk vaxtlarda işçilərin maaşlarının gecikməsi kimi problemlər var idi. Bəs indi necə, problem həll olunubmu?

- Son bir ildə, demək olar ki, kanalımızda belə bir problem qalmayıb. Bunu işçilərin özləri də təsdiqləyə bilərlər. Bu problem mən kanala rəhbər gəlməmişdən öncə olub. “Space” telekanalına rəhbərlik etdiyim ilk aylarda bu kimi məsələlər həll olundu. 

- Bəs hazırda “Space”də vakansiyalar varmı?

- Bununla bağlı müsabiqə elan etmişdik. Peşəkar simaları yenidən efirə qaytarırıq. Həmçinin yeni mövsümdə “Space”in efirində bir çox gənc simaları da görə biləcəksiniz. 

- Telekanala rəhbərlik etdiyiniz müddət ərzində düşündüklərinizi həyata keçirə bildinizmi?

- Xeyr. Hələ ki, arzusunda olduğum işləri kanalda görə bilməmişəm. Çünki bura gələrkən bütün əməyimi kanalın iş prinsipinin yenilənməsi və borcların qapadılmasına doğru yönəltmişdim. Lakin ümidimi qırmamışam. Xəyalımdakı TV-ni formalaşdırmaq üçün əməyimi və səylərimi davam etdirirəm. 

- Bu gün “Space” də daxil, demək olar ki, bütün kanallarımızda şou ilə bağlı verilişlər üstün yerdədir. Bu, maliyyə fəndləridir, yoxsa arxasında başqa səbəblər dayanır?

- Bu, sizin də qeyd etdiyiniz kimi, maddiyyatla, həm də vaxtilə buraxılmış səhvlərlə bağlıdır. Azərbaycan tamaşaçısının böyük bir hissəsi hazırda Rusiya və Türkiyə telekanallarına baxır. Biz çalışıb həmin kütlədə maraq yaradaraq öz kanalımıza kökləməyi bacarmalıyıq. Bu sahədə yeni yaranan milli reytinq şirkətimizi də vurğulamaq istərdim. İnanıram ki, onlar obyektiv olaraq qiymətləndirmə aparacaqlar və bu da kanallar arasındakı rəqabəti gücləndirəcək.

AzTV və İctimai Televiziyada hazırda çox ciddi layihələr həyata keçirilməkdədir. Məqsəd insanları daha çox TV-yə dəvət etməkdir. Bir məsələni də qeyd etmək istərdim ki, hazırda dünyada əsas izləyici kütləsi məhz sosial media üzərində cəmlənib və həmin izləyiciləri TV-yə cəlb etmək özlüyündə kifayət qədər zəhmət və kreativ yanaşma tələb edir. 

- Problemlərlə əlləşmək sizi yormayıb ki?

- Çətinliklərlə baş etmək, mübarizə aparmaq mənim taleyimə yazılıb (gülür). Mən “Azərbaycanfilm” kinostudiyasına rəhbər təyin olunduğum zaman yeddi filmin istehsalı yarımçıq dayanmışdı. Kinostudiya acınacaqlı vəziyyətdə idi. Ora rəhbərlik etdiyim səkkiz il ərzində mən 20-yə yaxın tammetrajlı, 30-a yaxın qısa metrajlı, 12 sənədli,120-ə yaxın gənc rejissorun filmlərini sınaqdan keçirdim. Mən “Azərbaycanfilm”dən ayrıldığım zaman artıq bu şirkət öz problemlərini həll etmişdi. Bu gün “Nabat”, “Dolu”, “Yarımçıq xatirələr” kimi filmlər də bir növ bizim iş prinsipimizin göstəriciləri sırasındadır. 

- “Space” TV izləyicilərinə nə demək istərdiniz?

- Öncə bu illər ərzində kanalımızı izləyən bütün izləyicilərimizə təşəkkür edirəm. Hal-hazırda kanalda gördüyümüz bütün işlər, ən çətin anlarımızda göstərdiyimiz bütün mücadilələr məhz izləyicilərimizin məmnunluğu üçündür. Dəyərli izləyicilərimizin tələb və təklifləri, o cümlədən də irad və tövsiyələri, şəxsən mənim və bütün kanalımızın diqqət mərkəzindədir. Deyərdim ki, kanalı dəyişmədən “Space” TV-yə köklənsinlər. Tezliklə yeni proqramlarla evinizin qonağı olacağıq.

Bizimlə əlaqə saxlayın

Digər Cəmiyyət xəbərləri