Azərbaycan Həndbol Federasiyasının saxtakarlığı: Oyunçu əvəzinə yarışa qeyrisi göndərilib - FOTOFAKT
Azərbaycan Həndbol Federasiyasının saxtakarlığı: Oyunçu əvəzinə yarışa qeyrisi göndərilib - FOTOFAKT
Azərbaycan Həndbol Federasiyasının (AHF) özbaşınalıq faktı üzə çıxıb.
Oxu.Az-ın xəbərinə görə, bu, ötən ay Avropa Həndbol Federasiyasının (EHF) qadın klubları arasında keçirdiyi Avropa Kuboku matçında olub.
Belə ki, Yunanıstanın Saloniki şəhərində 23-24 oktyabr tarixlərində keçirilən “Panorama” – “Azəryol” görüşünə komandamız 14 həndbolçu ilə getməli olsa da, AHF turnirin iştirak ərizəsinə 13 idmançı və 1 qeyri-idmançı əlavə edib.
İdmançı olmayan həmin şəxs federasiyanın əməkdaşı – ölkə çempionatı və kuboku yarışları üzrə katib, Respublika dərəcəli hakim və İdman ustası Fəridə Əliyevadır. O, 5 Mart – Bədən Tərbiyəsi və İdman Günü ilə bağlı Gənclər və İdman Nazirliyi tərəfindən 2018-ci ildə Bədən Tərbiyəsi və idman işçisi adına layiq görülüb, bir il sonra Əməkdar məşqçi adı alıb.
EHF-nin oyunla bağlı saytına yerləşdirilən şəkildən də 43 yaşlı Fəridə Əliyevanın həndbolçu olmadığını bilmək olur. O, 18 nömrəli mərkəz müdafiəçisi kimi sifariş edilib.
Qeyd edək ki, Azərbaycan Həndbol Federasiyasının prezidenti 2016-cı ilin dekabrın 1-dən Azərbaycan Avtomobil Yolları Agentliyinin İdarə Heyətinin sədri Saleh Məmmədovdur.
Səbuhi Musayev