Tanımadığınız Gürcüstan - Turizm üçün hər şey edən gürcülər - FOTO

19 Dek, 2017

11:34

12956

154

Tanımadığınız Gürcüstan - Turizm üçün hər şey edən gürcülər - FOTO

Gürcüstan Turizm Adminstrasiyasından mediatur təklifi alanda, düzü, qəribə oldum. Vətəndaşı olduğum ölkəyə turist kimi səfər edəcəkdim.

Beləliklə, Oxu.Az Gürcüstanda qış turizmi ilə bağlı keçirilən mediaturdan ilk yazını təqdim edir.

Tbilisi bizi qarla qarşıladı. Amma gördüyümüz isti münasibət soyuq havanı bizə unutdura bildi.

Xüsusi ilə bələdçimiz Marika Boqveradzenin rəhbərliyi ilə keçən turumuz xoş xatirələrlə yadda qaldı.

İlk olaraq Tbilisi yaxınlığında yerləşən Sodoroti kəndinə yollanırıq. Əhalisinin 79 faizini azərbaycanlıların, 21 faizini isə gürcülərin təşkil etdiyi kəndə maraq yaradan isə Jvaniya ailəsidir.

Ailə başçısı İrakli Jvaniya heykəltəraşdır. Özünün dediyinə görə, diplom almaq xatirinə bu sənətə yiyələnib. Əslində isə məşhur heykəltəraş Zurab Seretelidən dərs alıb.

Sonradan bu sənətə mükəmməl yiyələnən İrakli məşhur heykəltəraşlardan sayılır. Tbilisidə “Balaca Şahzadə” heykəli ilə məşhurlaşan İrakli Jvaniyanın müəllifi olduğu abidələr Avropanın bir neçə ölkəsini bəzəyir.

Şəhərdən uzaqlaşmaq üçün Sodoretidə ev alan İrakli sonradan burada restoran açmaq qərarına gəlir.

Evinin birinci mərtəbəsində ideyasını gerçəkləşdirən heykəltəraş özünün istehsal etdiyi şəraba görə indi xeyli məşhurdur. Müştərilərini cəlb edən də elə bu şərablardır.

İraklinin babası isə Stalinin sevimlilərindən olub.

Stalinin ona bağışladığı SSRİ-yə gətirilmiş ilk ananas isə hələ də xüsusi qaydada saxlanılır və restoranın bəzəyini təşkil edir.

Restoranın bəzəyi həm də bu evin xanımı olan Esma Kunçuliadır. İxtisasca jurnalist olan xanım Kunçulia vaxtilə Gürcüstanın birinci kanalında siyasət müxbiri olub.

Hazırda isə jurnalistikadan mətbəxə keçib. Televiziyada mətbəx verilişində müəllif və aparıcı olan Esma Kunçulia orada öyrəndiklərini həm də öz restoranının mətbəxində tətbiq edir. Onun saperavidə qızardılmış toyuq yeməyinin dadından isə doymaq olmur. Esma Kunçulia Gürcüstanda ilk dəfə olaraq kulinariya muzeyi də yaratmağa başlayıb.

Sodoretidən ayrılıb üz tuturuq “Mağaralar şəhəri” olan Uplisçixiyə...

Uplisçixi Qori rayonunda yerləşir. Şəhərin eramızdan əvvəl II əsrin sonları – I əsrin əvvəlləri salındığı güman olunur. Şəhər XIX əsrin sonlarında tam tərk edilib. Şəhərdə olan 700 mağaradan 150-si bugünə qədər gəlib çatıb.

1950-ci ildən bəri isə ərazi turizm mərkəzi kimi fəaliyyət göstərir.

2000-ci ildə baş verən zəlzələ isə abidələrə ciddi ziyan vurub.

Burada qədim dövrlərə aid mağaralar, abidələr isə görənləri heyran edir. Gürcüstana gedənlər bu “Mağaralar şəhəri”ni görmədən keçməsinlər.

Uplisçixidə kampinq üçün də şərait yaradılıb.

Hazırda bura muzey statusu daşıyır. Bir nəfərin girişi 2 manatdır. Qrup şəklində isə bu qiymət 1.5 manata qədər enir. Bələdçi xidməti isə 10 manatdır.