Tbilisidə etiraz: polis aksiyanı dağıdıb, 70 nəfər yaralanıb - YENİLƏNİB + FOTO/VİDEO

Polisin xüsusi təyinatlı qüvvələri Gürcüstan parlamentinin qarşısında keçirilən etiraz aksiyasını dağıdıb.

“Sputnik” bildirir ki, polis əməkdaşları mitinq iştirakçılarının həbsinə başlayıb.

Aksiya iştirakçılarına qarşı iki dəfə gözyaşardıcı qaz tətbiq olunub. Etirazçılara qarşı rezin güllələrdən də istifadə edildiyi barədə məlumatlar yayılıb.

Parlamentin binası qarşısında yaranan qarşıdurma zamanı 70-ə yaxın insan xəsarət alıb. Onlardan 30 nəfərinın etirazçı, 39 nəfərinın polis əməkdaşı olduğu bildirilir.

Yaralananlar arasında jurnalistlər də var.

Tbilisidə polis parlament binası önünə toplanmış etirazçıları dağıtmaq üçün havaya atəş açıb

TASS xəbər verir ki, etirazçılara qarşı gözyaşardıcı qaz tətbiq olunur. Aksiya iştirakçıları parlament qarşısından uzaqlaşmağa başlayıblar.

00:52

Gürcüstanda mitinqçilər parlament binasına daxil olmağa çalışıb. Polis nümayişçilərin qarşısını kəsib.Tərəflər arasında toqquşma baş verib.

BBC xəbər verir ki, parlament binasının həyətinə hərbi texnika və xüsusi təyinatlılar cəlb olunub.

Daxili işlər naziri Georgi Qaxariya etirazçıları dərhal meydanı tərk etməyə və qanuna əməl etməyə çağırıb:

 “Mən meydanda olan hər bir vətəndaşı polisə tabe olmağa çağırıram. Burada baş verənlər dövlət qurumuna hücum deməkdir”.

Qaxariyanın dediyinə görə, insident müəyyən siyasi qüvvələr tərəfindən təşkil edilib və ölkəni fəlakətə sürükləmək məqsədi daşıyır. O, lazım gələrsə, istefa verəcəyini də bəyan edib.

Qeyd edək ki, Parlamentlərarası Pravoslavlıq Assambleyasında Rusiya Kommunist Partiyasının nümayəndəsi Sergey Qavrilovun Azərbaycanda səfərdə olan İrakli Kobaxidzenin yerində oturması parlamentdə gürcü deputatların etirazına səbəb olub. Onlar ümumiyyətlə, rusiyalı nümayəndə heyətinin Tbilisidə olmasına etiraz ediblər. Gürcüstanın hakim “Gürcü arzusu – demokratik Gürcüstan” partiyasının liderləri baş verənləri “protokol səhvi” adlandırsa da, müxalifət bununla razılaşmayıb.

Parlamentin qarşısına toplaşan nümayişçilər spiker İrakli Kobaxidzenin istefasını tələb edirlər. Mitinqdə, həmçinin, növbədənkənar seçkilərin keçirilməsi tələb edilir.