“Baku Steel Company” zavodunda baş verən partlayışın səbəblərinin araşdırılması üçün komissiya yaradılacaq.
Bu barədə Oxu.Az-a açıqlamasında Dövlət Əmək Müfəttişliyi Xidmətinin (DƏMX) rəis müavini Məhərrəm Məhərrəmov bildirib.
“Hazırda məsələ xidmət tərəfindən araşdırılır. Partlayışın hansı səbəblərdən baş verməsi yoxlanılır. Həmkarlar İttifaqı və DƏMX əməkdaşlarının birgə iştirakı ilə xüsusi komissiya yaradılacaq.
Mütəxəssislər hadisə baş vermiş yerə baxış keçirəcək. İlkin qərar isə qanunvericiliyə uyğun olaraq, ən geci iyirmi gün ərzində qəbul ediləcək”.
Xatırladaq ki, Bakı şəhəri, Nərimanov rayonu, Z.Bunyadov prospektində yerləşən “Baku Steel Company” zavodunda istehsalat qəzası nəticəsində partlayış baş verib.
Report xəbər verir ki, partlayış nəticəsində beş nəfər xəsarət alıb.
Həmin şəxslər zavodda işləyənlər - Sumqayıt şəhər sakini, 1951-ci il təvəllüdlü Ələsgər Ələsgərov, Masallı rayon sakini, 1970-ci il təvəllüdlü Elsevər İbadullayev, 1971-ci il təvəllüdlü Məmməd Kərimov, Şabran rayon sakini, 1959-cu il təvəllüdlü Nüsrətdin Səfərov və 1982-ci il təvəllüdlü Natiq Salmanovdur.
Yaralılar müxtəlif xəsarətlərlə xəstəxanaya yerləşdiriliblər.
Ə.Ələsgərov və E.İbadullayev tibbi yardım aldıqdan sonra evə buraxılıb, digər yaralıların vəziyyəti orta ağırdır.
Faktla bağlı araşdırma aparılır.
Ülviyyə R. Əli
www.oxu.az
