Muğanlı-İsmayıllı yolunda ağır yol-nəqliyyat hadisəsi zamanı xəsarət alan şəxslərin vəziyyəti açıqlanıb.
Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) bildirilib ki, iyunun 10-da saat 09:50 -də Şamaxı rayonu ərazisində baş verən yol-nəqliyyat hadisəsi səbəbi ilə iki nəfər (kişi) Şamaxı Rayon Mərkəzi Xəstəxanasının (RMX) Təcili yardım şöbəsinə hospitalizasiya olunub.
"Yaralılara dəqiqləşdirilməmiş kəllədaxili travma, qabırğaların çox sayda sınığı, bədənin müxtəlif nahiyələrinin əzilmiş yaraları diaqnozları təyin olunub və zəruri tibbi yardım göstərilib.
1986-cı il təvəllüdlü (kişi) şəxs daha ixtisaslı xidmət göstərilməsi üçün Bakı şəhərinə, Topçubaşov adına Elmi Cərrahiyyə Mərkəzinə təxliyə olunub. 1993-cü il təvəllüdlü pasiyentin müalicəsi isə tibb müəssisəsinin Təcili yardım şöbəsində davam etdirilir, vəziyyəti orta ağır qiymətləndirilir", - deyə məlumatda bildirilib.
Qeyd edək ki, ilkin məlumatda hadisə nəticəsində sürücünün xəsarət aldığı bildirilmişdi.
Oxu.Az-ın əldə etdiyi məlumata görə, xəsarət alan iki nəfər şəxs qəzaya düşən avtomobildə olan sərnişinlər 40 yaşlı Qoşqar Babayev və 33 yaşlı Füzuli Abbaszadədir.
Muğanlı-İsmayıllı yolunda ağır yol-nəqliyyat hadisəsi baş verib.
Bu barədə Oxu.Az-ın qaynar xəttinə məlumat gəlib.
Qeyd olunub ki, hərəkətdə olan yük avtomobili yol kənarındakı beton maneələrə çırpılıb. Nəticədə avtomobil yararsız hala düşüb.
Oxu.Az-ın sorğusuna cavab olaraq Baş Dövlət Yol Polisi İdarəsindən (BDYPİ) fakt təsdiqlənib.
Qeyd olunub ki, sözügedən yol-nəqliyyat hadisəsi bu gün səhər saat 9 radələrində Muğanlı-İsmayıllı yolunun 8-ci km-də, üzü Şamaxı istiqamətində baş verib.
"Hadisə Məhəmməd Mübariz oğlu Vahidlinin idarə etdiyi "Mitsubishi" markalı, 10-VL-923 dövlət nömrə nişanlı yük avtomobili ilə hərəkətdə olarkən idarəetməni itirməsi nəticəsində baş verib. Hadisə nəticəsində sürücü xəsarət alıb. Hazırda əməliyyatdadır. Ölən yoxdur. Faktla bağlı araşdırma aparılır", - deyə məlumatda bildirilir.
