ABŞ Prezidenti Donald Tramp İranla hərbi toqquşmaların bir neçə həftə ərzində başa çatacağını gözləsə də, nəticədə Vaşinqton sonu görünməyən uzunmüddətli münaqişə ilə üz-üzə qalıb.
Oxu.Az xəbər verir ki, bu barədə "The Wall Street Journal" özəl mənbələrinə istinadən informasiya yayıb.
Məlumata əsasən, Ağ Ev rəhbəri mövcud vəziyyətdən qəzəblidir.
Qeyd olunur ki, Tramp Tehranla münaqişənin diplomatik yolla həlli imkanına getdikcə daha az inanır.
Nəşrin mənbələrindən birinin sözlərinə görə, ABŞ prezidenti İrana qarşı qisas rejiminə keçib və hesab edir ki, rəsmi Tehran yalnız hərbi güc dilindən anlayır.
Yazıda vurğulanır ki, eyni zamanda ABŞ prezidentinin xüsusi nümayəndəsi Stiven Uitkoff və Trampın kürəkəni Cared Kuşner İranla razılaşmanın hələ də mümkün olduğunu düşünürlər.
Qeyd edək ki, ABŞ və İsrail fevralın 28-də İrana qarşı müharibəyə başlayıb. İyun ayında Vaşinqton və Tehran bütün cəbhələrdə, o cümlədən Livanda hərbi əməliyyatların dərhal dayandırılmasını nəzərdə tutan anlaşma memorandumu imzalayıblar. Lakin iyulun 8-nə keçən gecə ABŞ İranı Hörmüz boğazı ilə bağlı əldə olunmuş razılaşmaların şərtlərini pozmaqda ittiham edərək, bu ölkəyə qarşı genişmiqyaslı zərbələri bərpa edib.
