Çexiya Prezidenti Petr Pavel avtomobil idmanı üzrə Macarıstan Qran-prisində yalnız dövlət başçısı kimi deyil, həm də fotoqraf qismində iştirak edib.
Oxu.Az Motorsport.com-a istinadən xəbər verir ki, Pavel "Hunqarorinq" avtodromuna peşəkar fototexnika və FIA-nın rəsmi akkreditasiyası ilə gəlib.
Şənbə günü keçirilən yürüşlər zamanı o, trasda baş verənləri lentə alıb. Çexiyalı "Formula-1" fotoqrafı İrji Krjenek də ona müşayiət edib.
Petr Pavel həvəskar fotoqraf kimi irimiqyaslı avtoidman tədbirlərinə ilk dəfə qatılmır. O, iyun ayında Fransada keçirilən "Le-Manın 24 saatı" yarışında da iştirak edib və özü ilə peşəkar fototexnika aparıb.
NATO Hərbi Komitəsinin keçmiş sədri uzun illərdir idman fotoqrafiyasına maraq göstərir. O, Brnoda keçirilən "MotoGP" və "World Superbike" yarışlarını lentə alıb, həmçinin NASCAR yarışlarını və Dakar rallisini çəkmək üçün ABŞ və Səudiyyə Ərəbistanına səfər edib.
