“Crocus City Hall”da terror aktını törədənlər onlara vəd olunan mükafatı almaq üçün Kiyevə getmək istəyiblər

Rusiyanın Moskva vilayətində “Crocus City Hall” konsert zalında terror aktı törətməkdə təqsirləndirilən şəxslərin hərəkətlərini həm hazırlıq mərhələsində, həm də silahlı hücumdan sonra “Telegram” messencerində səsli mesajlar vasitəsilə bir kişi koordinasiya edib.

Bununla bağlı danışan təqsirləndirilən şəxslər bildiriblər ki, koordinasiya edən kişi özünü onlara təxəllüsü ilə təqdim edib.

Bu barədə Rusiya Federasiyasının İstintaq Komitəsindən məlumat verilib.

Koordinatorun göstərişi ilə terrorçular cinayəti törətdikdən sonra avtomobillə Rusiya-Ukrayna sərhəddinə doğru gediblər, sərhədi keçmək və onlara vəd olunan mükafatı almaq üçün Kiyevə getmək istəyiblər.

Daha əvvəl Rusiya İstintaq Komitəsi bildirib ki, müstəntiqlər “Crocus City Hall”da terror aktını törədənlərin cinayətin hazırlanmasında istifadə etdikləri xeyli miqdarda pul və kriptovalyutanı Ukraynadan əldə etdikləri barədə məlumat alıblar. Qurum həmçinin qeyd edib ki, istintaqın ilkin nəticələri terrorçuların əməllərinin planlaşdırılmış xarakterli olduğunu, o cümlədən buna ciddi hazırlıq getdiyini və cinayətin təşkilatçılarından maliyyə dəstəyi alındığını tam şəkildə təsdiqləyir.

Xatırladaq ki, martın 22-də axşam saatlarında “Crocus City Hall”da terror aktı törədilib. Son məlumatlara görə, 144 nəfər həlak olub, 382 nəfər yaralanıb, onlardan 217 nəfərə ambulator yardım göstərilib.

Elə həmin gün terror aktını törədən dörd nəfər saxlanılıb: Dalerjon Mirzoev, Saidakram Raçabalizoda, Şamsidin Fariduni və Muxammadsobir Fayzov. Onlar Bryansk vilayətində, Ukrayna sərhədinə doğru getdikləri zaman saxlanılıblar. Daha beş nəfər, istintaqın fikrincə, cinayətin ortaqlarıdır.

Mənbə: TASS