Alimlər XVI əsrdə İtaliyada yaşamış Mediçi sülaləsinin iki nümayəndəsinin ölümü ilə bağlı uzun illərdir davam edən mübahisəyə aydınlıq gətiriblər.
Oxu.Az "iScience" jurnalına istinadən xəbər verir ki, yeni araşdırma nəticəsində tarixi şəxsiyyətlərin ölüm səbəbi müəyyən edilib.
1562-ci ildə 19 yaşlı kardinal Covanni Mediçi, 1587-ci ildə isə onun böyük qardaşı, Toskana hersoqu I Françesko Mediçi vəfat edib. Qeyd edək ki, Françesko və həyat yoldaşı Byanka Kappellonun bir gün fərqlə dünyasını dəyişməsi, onların arsenlə zəhərlənməsi barədə şayiələrin yayılmasına səbəb olmuşdu.
Tədqiqatçılar qardaşların qabırğa sümüklərindən götürülmüş DNT nümunələrini analiz edərək, malyariyaya səbəb olan "Plasmodium" parazitinin izlərini aşkar ediblər. Genetik analiz onların ölümünün zəhərlənmə deyil, məhz malyariya nəticəsində baş verdiyini təsdiqləyib.
Araşdırma zamanı kardinal Covanni Mediçinin sümüklərində əvvəllər məlum olmayan "Plasmodium falciparum" ştamı müəyyən edilib. I Françesko Mediçinin qalıqlarında isə həm "Plasmodium falciparum", həm də "Plasmodium malariae" növlərinin izləri aşkarlanıb ki, bu da onun eyni anda iki fərqli malyariya törədicisi ilə yoluxduğunu göstərir.
Alimlərin fikrincə, Covannidə aşkarlanan ştamın iki unikal genetik mutasiyası parazitin Avropada yayılması zamanı təkamül keçirdiyini sübut edir.
