İran hökuməti Argentina Hərbi Dəniz Qüvvələrini və Hərbi Hava Qüvvələrini terror təşkilatları elan edib. Bu qərar Argentinanın İslam İnqilabı Keşikçiləri Korpusunu (SEPAH) terror təşkilatları siyahısına daxil etməsinə cavab olaraq verilib.
Oxu.Az-ın "Kommersant" nəşrinə istinadən xəbərinə görə, bu barədə İran Xarici İşlər Nazirliyinin mətbuat xidmətindən məlumat verilib.
Məlumata görə, belə bir qərar üçün əsas 2019-cu ildə qəbul edilmiş "ABŞ tərəfindən İslam İnqilabı Keşikçiləri Korpusunun terror təşkilatı kimi tanımasına cavab olaraq qarşılıqlı tədbirlər haqqında" Fərman olub.
Qeyd edək ki, Argentina hakimiyyəti aprel ayında SEPAH-ı terror təşkilatı kimi tanıyıb. Buna səbəb Buenos-Ayresdə baş verən iki terror hücumu olub: 1992-ci ildə İsrail səfirliyinin binasında və 1994-cü ildə AMIA yəhudi icma mərkəzində partlayışlar. Argentina hesab edir ki, hər iki hücumda İranın əli var.
