Ərzincan millət vəkili Mustafa Sarıgülə qarşı yeni, qalmaqallı iddialar irəli sürülüb.
Oxu.Az xəbər verir ki, Türkiyənin "Yeni Akit" nəşrinin əldə etdiyi məlumata görə, siyasətçi və onun keçmiş mühafizəçisi zəngin qonaqların iştirakı və anonimliyi qorumaq məqsədilə maskalardan istifadə edilməsi ilə tanınan "Fergio House"un qapalı şənliklərində iştirak ediblər.
Tədbir iştirakçılarının siyahısı redaksiyanın əlinə keçib. İddia edilir ki, Sarıgülün adı bu siyahıda 10-cu sıradadır.
Bundan əlavə, qəzet bildirir ki, mövcud olan videoçəkilişdə şənlik təşkilatçıları ondan külli miqdarda gəlir əldə etdiklərini vurğulayırlar.
"Yeni Akit" həmçinin iddia edir ki, redaksiyaya daxil olan kadrlarda VIP avtomobildə gözləri bağlanmış şəxs Mustafa Sarıgülə, ofisiant geyimində görüntülənən şəxs isə onun keçmiş mühafizəçisinə bənzəyir.
Qeyd edək ki, çirkli pulların yuyulması, korrupsiya və gizli ortaqlıqlarla bağlı başlanmış cinayət işində adıçəkilənlər arasında Mustafa Sarıgülün keçmiş xanımı Aylin Kotil, oğulları Ömər Sarıgül və tanınmış müğənni Sibel Canla sevgili olan Əmir Sarıgül də var. Bundan başqa, sözügedən istintaqa jurnalist Murad Ağırel də cəlb edilib.
Həmçinin, Mustafa Sarıgül haqqında bir sıra ağır ittihamlar üzə çıxıb; bura qeyri-etik münasibətlər, təcavüzlər və tələbələrin istismar olunduğuna dair iddialarla yanaşı, Yeni Partiya sədri Özgür Özələ 350 min dollar rüşvət verildiyinə dair məlumatlar da daxildir.
