Fransada sentyabrın 17-də başlayan etiraz aksiyaları son bir ay ərzində gərginləşərək zorakı toqquşmalarla müşayiət olunub. Kütləvi nümayişlər zamanı çox sayda insan yaralanıb və saxlanılıb. Etirazları işıqlandıran azərbaycanəsilli tanınmış fotojurnalist Reza Deqati də Parisdə baş verən hadisələr xəsarət alıb.
Reza Deqati hadisənin hansı şəraitdə baş verdiyini, Fransada etirazların əsas səbəblərini və aksiyalar ətrafında yaranmış vəziyyət Oxu.Az-a danışıb.
Jurnalistin sözlərinə görə, Fransada etirazların ilkin səbəblərindən biri məktəblərdə və xəstəxanalarda yaranmış ciddi problemlər, eləcə də bu sahələrdə çalışanların və təhsil alanların qanuni hüquqlarının təmin olunması tələbləri olub:
"Təxminən bir aydır davam edən narazılıqların əsasını təhsil və səhiyyə müəssisələrindəki ağır vəziyyət təşkil edir. Məktəblərdə sinif otaqlarının həddindən artıq dolu olması, müəllim çatışmazlığı və binaların yararsız vəziyyəti şagirdlərin və təhsil işçilərinin etirazına səbəb olub. Səhiyyə sektorunda çalışanlar da ölkənin bir sıra şəhərlərində aksiya keçirərək tibb müəssisələrində kadr və maliyyə çatışmazlığına, iş şəraitinin pisləşməsinə və hökumətin onların tələblərinə lazımi səviyyədə cavab verməməsinə etiraz ediblər".
"Sentyabrın 17-dən başlayan etirazlara hökumətin vaxtında reaksiya verməməsi vəziyyətin daha da gərginləşməsinə şərait yaradıb. Onların fikirləri var idi ki, bu aksiyaların qarşısını necə alsınlar. Yəni iğtişaşlar baş versin, bundan sonra hamının diqqəti zorakı hadisələrə yönəlsin və əsas hüquqlarla bağlı tələblər yaddan çıxsın. Elə də oldu. Aksiyalar zamanı yaranmış vəziyyətdən Fransadakı ifrat sağçı qüvvələr də öz məqsədləri üçün istifadə etməyə çalışıblar. Onlar iğtişaşlarda iştirak edənlərin miqrantlar olduğunu iddia edərək bu hadisələri miqrasiya əleyhinə mövqelərini gücləndirmək üçün əsas kimi təqdim ediblər. Lakin saxlanılan şəxslərlə bağlı açıqlanan rəqəmlər bu iddiaların mübahisəli olduğunu göstərir. Məlumata görə, təxminən 2 000 nəfər saxlanılıb və polisin açıqlamasına əsasən, onların yalnız 27 faizi miqrant olub", - müsahibimiz deyib.
O, Parisdə yaralanması ilə nəticələnən hadisənin təfərrüatını da bölüşüb:
"Oktyabrın 13-də Parisdə keçiriləcək sərgim ilə əlaqədar Fransaya getdim və oktyabrın 18-də geri qayıtmağı planlaşdırırdım. Oktyabrın 17-də isə etiraz aksiyalarını lentə almaq üçün hadisə yerinə yollandım. Ətraf duman, tüstü içində idi. Oradakı jurnalistlərin işi bu olduğu üçün onlar əvvəlcədən hazırlıqlı idilər, qaz maskaları taxmışdılar. Mən isə hazırlıqsız idim. Qəfil gözüm tüstüdən yaşarmağa başladı, hətta bir müddət özümü itirdim. Qəfildən qolumun üstündən möhkəm zərbə gəldi. Bilmədim, polis idi, yoxsa atılan daşlardan biri dəydi. Amma növbəti gün qolum tərpənmirdi. Elə ağır zərbə almışdım".
Fransadakı hadisələr zamanı xəsarət alan azərbaycanlıların olub-olmaması məsələsinə də toxunan fotojurnalist bu barədə məlumatının olmadığını deyib:
"Çünki qaynar nöqtələrə çox az adam gedir. Buna görə də Fransada yaralanmış azərbaycanlılarla bağlı mənə hər hansı məlumat daxil olmayıb".
