Bakıda yunan-Roma güləşi üzrə Dünya Kubokunun açılış mərasimi keçirilib - YENİLƏNİB + FOTO
Bakıda yunan-Roma güləşi üzrə Dünya Kubokunun açılış mərasimi keçirilib - YENİLƏNİB + FOTO
Bakıda yunan-Roma güləşi üzrə Dünya Kubokunun açılış mərasimi keçirilib.
“Report”un məlumatına görə, Bakı İdman Sarayındakı tədbirdə gənclər və idman naziri Fərid Qayıbov və Dünya Güləş Birliyinin (UWW) büro üzvü, həmçinin UWW Avropanın prezidenti Karl-Martin Ditman iştirak ediblər.
Yarış haqqında məlumat verildikdən sonra Fərid Qayıbov çıxış edib. Qonaqları salamlayan nazir güləşin Azərbaycanda ən məşhur idman növlərindən biri olduğunu vurğulayıb: “Bu növdə kifayət qədər yaxşı nəticələrimiz var. Azərbaycan Güləş Federasiyası da çox fəaldır. Dünya Kubokunun təşkilatçılığı da bunu deməyə əsas verir. Dövlətin güləşə və idmana qayğısı var. Dünən Bakıda cüdo üzrə Böyük Dəbilqənin açılışında iştirak etdik. Bu gün isə başqa irimiqyaslı turnir başlayıb. İdman daim dövlətimizin və Prezidentin diqqətindədir. Bu yarışda və gələcəkdə digər turnirlərdə mübarizə aparacaq idmançılarımıza uğurlar arzulayıram”.
Karl-Martin Ditman yarışın əhəmiyyətindən danışıb və UWW prezidenti Nenad Laloviçin adından salamlarını çatdırıb.
Daha sonra açılış mərasimi bədii hissə ilə davam edib. İlk olaraq meydana Azərbaycanın, daha sonra isə digər ölkələrin bayraqları gətirilib.
Photostock.az həmin tədbirdən görüntüləri lentə alıb:
Daha çox şəkil burada: Photostock.az
09:22
Bu gün Bakı İdman Sarayında yunan-Roma güləşi üzrə Dünya Kubokuna start veriləcək.
“Report”un məlumatına görə, ilk yarış günündə A və B qrupunda qarşılaşmalar təşkil olunacaq.
İlk olaraq A qrupunda Türkiyə və İran seçmələri üz-üzə gələcəklər.
Daha sonra saat 16:00-da turnirin açılış mərasimi baş tutacaq.
Saat 17:00-dan A qrupunun İran-Qırğızıstan, Qırğızıstan-Türkiyə və B qrupunun Azərbaycan-Dünya yığması görüşləri keçiriləcək.
B qrupunda mübarizə aparmalı olan Serbiya kollektivi koronavirusa kütləvi yoluxma səbəbindən Dünya Kubokunda iştirak etməyəcək.
Qeyd edək ki, yarışa noyabrın 6-da yekun vurulacaq.
Photostock.az oyundan görüntülər lentə alıb:
Daha çox şəkil burada: Photostock.az