Ermənistanda ölən hərbçinin anası Paşinyanın oğluna görə saxlanılıb – YENİLƏNİB + VİDEO

Ermənistan polisi ölkənin baş naziri Nikol Paşinyanın oğlu Aşotu qaçırmaqda günahlandırılan “Oğulların çağırışı” ictimai təşkilatının nümayəndələrini saxlayıb.

Ölkənin İstintaq Komitəsinin məlumatına görə, saxlanılanların arasında 44 günlük müharibə zamanı ölmüş Jora Martirosyan adlı hərbçinin anası da var. Saxlanılanlar 23 yaşlı oğlanın avtomobilə könüllü əyləşdiyini, heç bir zorakılıq və məcbuetmə faktının olmadığını bildiriblər.

İddiaya görə, Aşot qəfildən avtomobildən çölə atılıb və arxadan gələn nəqliyyat vasitəsinin zərbəsinə tuş gələrək ayağından yaralanıb. Sonradan kiçik Paşinyan hadisə ilə bağlı hüquq-mühafizə orqanlarına müraciət edib.

18:55

Paşinyanın oğlunun qaçırılmasına cəhdin görüntüləri yayılıb.

Kadrlarda Aşot Paşinyanın avtomobildən özünü atdığı görünür. Bildirilir ki, artıq Ermənistan İstintaq Komitəsi məsələ ilə bağlı adam oğurluğu maddəsi üzrə cinayət işi açıb.

17:51

“Aşot Paşinyan könüllü olaraq ölən hərbçilərin valideynlərinin maşınına minib, zorakılıq olmayıb”.

Bu barədə Qarabağ müharibəsində həlak olan hərbçilərin valideynləri tərəfindən yaradılan ictimai təşkilatının üzvlərindən biri Qarik Qaleyan deyib.

Ölən erməni hərbçinin atası adam oğurluğuna cəhdin olmadığını vurğulayıb.

Onun sözlərinə görə, valideynlər təsadüfən baş nazir Nikol Paşinyanın oğlu ilə küçədə rastlaşıblar. Ölən erməni əsgərlərinin birinin anası ona Yerablur hərbi panteonuna getməyi və “atası ilə anasının nə etdiyini” görməyi təklif etdi. Aşot Paşinyan özü maşına minib, ona heç kim toxunmayıb.

O, Paşinyanın xəsarət alması ilə bağlı xəbərləri də təkzib edib:

“Gəncin özü qapını açıb, maşından atılıb qaçıb”.

Ermənistanda ölən hərbçinin anası Paşinyanın oğluna görə saxlanılıb – YENİLƏNİB + VİDEO

16:51

Ermənistanın baş naziri Nikol Paşinyanın oğlu Aşotu evlərinin yanındakı ərazidən qaçırmağa cəhd ediblər.

Paşinyan ailəsinə məxsus “Haykakan Jamanak” qəzeti yazır ki, ilkin məlumatlara görə, oğurluğa cəhd edən şəxslər Qarabağ müharibəsində həlak olan hərbçilərin valideynləri tərəfindən yaradılan “Oğulların çağırışı” ictimai təşkilatının üzvləridir.

Bildirilir ki, onlar Aşot Paşinyanı maşına minməyə məcbur ediblər, lakin avtomobil dayanan zaman o qaçmağa müvəffəq olub, bundan sonra A.Paşinyanı eyni təşkilatın arxadan gələn maşını vurub.

O, ayağından xəsarət alıb, hüquq-mühafizə orqanlarına müraciət edib, ictimai təşkilatın üzvləri hadisə yerini tərk ediblər.