Husilərin Qırmızı dənizdə yük gəmisini ələ keçirmələrinin görüntüləri yayıldı - VİDEO

Qırmızı dənizdə Yəmənin “Ənsar Allah” (husilər) üsyançı hərəkatı tərəfindən ələ keçirilən “Galaxy Leader”in operatoru Yaponiyanın “Nippon Yusen” (NYK Line) şirkətidir.

Bu barədə “Kyodo” agentliyi məlumat yayıb.

Bildirilir ki, göyərtədə Bolqarıstan, Meksika, Rumıniya, Ukrayna və Filippindən 25 ekipaj üzvü olub. Komandada nə İsrail, nə də Yaponiya vətəndaşının olmadığı vurğulanır. Gəmi Böyük Britaniyadan olan bir şirkətə məxsusdur.

Sosial şəbəkələrdə gəminin husilər tərəfindən ələ keçirilməsinin görüntüləri yayılıb.

Xatırladaq ki, “Ənsar Allah”ın sözçüsü Yəhya Səriya Qırmızı dənizdə İsrail gəmisini ələ keçirərək onu Yəmən sahillərinə çəkdiyini iddia edib. Bəyanata görə, heyət üzvləri saxlanılıblar.

Öz növbəsində İsrail Müdafiə Qüvvələri bəyan edib ki, Türkiyədən Hindistana səfər edən “Galaxy Leader”in yəhudi dövləti ilə heç bir əlaqəsi yoxdur və ekipaj üzvləri arasında heç bir israilli yoxdur. İsrailin baş naziri Benyamin Netanyahunun ofisi gəminin ələ keçirilməsində İranı günahlandırıb.

Gəmi Baham adaları Birliyinin bayrağı altında üzüb. O, sonuncu dəfə yerləşdiyi yer haqqında məlumatı noyabrın 18-də saat 13:04-də ötürüb. Hazırda gəminin transponderləri sıradan çıxarılıb.

Mənbə: TASS