Üç yaşlı Zəhranın yardımsevər şəxslərin dəstəyinə ehtiyacı var.
Bu barədə Oxu.Az-a onun anası Nərmin Məmmədova məlumat verib.
O bildirib ki, övladı ötən il noyabrın 28-də ehtiyatsızlıqdan yanıq xəsarətləri alıb:
"Zəhranın üç yaşı var. Biz Bərdədə yaşayırıq. Yanımda oynayan Zəhra qaçarkən köynəyi içində su qaynayan qazanın qulpuna ilişdi, qazandakı qaynar su üstünə dağıldı. Həmin gün onu Bakıda yerləşən xəstəxanalardan birinə gətirdik. Orada bir aya yaxın müalicə aldıq".
Gənc ana övladının müalicəsi üçün yardımsevər şəxslərə səslənib:
"Zəhranın qarnı, qolları, ayaqları tam yanıb. Bir aya yaxın xəstəxanada müalicə aldıq. Evə çıxandan sonrakı müalicəni isə sizin saytın izləyicilərinin dəstəyi ilə edə bilirik. Zəhranın bədəninin böyük hissəsi yandığı üçün mazları, kremləri çox sürətlə bitir. Qiymətləri isə bizim üçün çox bahadır. Həmin mazlardan istifadə etməyəndə də yaraları suluqlayır, daha şiddətli ağrı verir. Zəhra bəzi günlər yaralarının ağrısından dayanmadan ağlayır, haldan düşür, yatıb qalır. Balamın bu vəziyyətinin qarşısında çox çarəsizəm, yardımsevər şəxslərdən bizə dəstək olmalarını, ağır günlərdən çıxmağımıza kömək olmalarını istəyirəm".
Ailə ilə əlaqə: 055 316 46 92.
"Unibank": 5243 7544 3461 5603.
