"AmCham" Azərbaycanın 17 iyun 2026-cı il tarixində keçirilən illik ümumi yığıncağı çərçivəsində palatanın üzvləri tərəfindən 2026-2028-ci fəaliyyət dövrü üzrə yeni prezident və idarə heyəti seçilib.
Yeni seçilən idarə heyətində Azərbaycanda fəaliyyət göstərən aparıcı yerli və beynəlxalq şirkətlərin yüksək səviyyəli rəhbərləri təmsil olunur. Heyətdə "Cisco", "McDonald's", "Philip Morris International" (PMI), "Deloitte" kimi aparıcı ABŞ şirkətlərinin nümayəndələrinin təmsil olunması Amerika bizneslərinin Azərbaycandakı fəal iştirakını və ölkənin investisiya mühitinə olan davamlı marağını bir daha nümayiş etdirir.
Yeni idarə heyətinin tərkibi aşağıdakı üzvlərdən ibarətdir:
- Nuran Kərimov - "Deloitte" şirkətinin idarəedici partnyoru;
- Oskar Boqopolski - "McDonald's Azərbaycan" şirkətinin baş direktoru;
- Niyazi Əmirbəyov - "AgroDairy" şirkətinin baş icraçı direktoru;
- Günay Cəlilova - "Yelo Bank"ın idarə heyəti sədrinin müavini;
- Ramil Eyyubov - "Cisco" şirkətinin Qafqaz və Mərkəzi Asiya regionu üzrə direktoru;
- İmran Əhmədzadə - "NEQSOL Holding" Azərbaycan üzrə rəhbəri və "NEQSOL Holding Global" şirkətinin baş maliyyə direktoru;
- Elyar Əliyev - bp-nin Azərbaycan, Gürcüstan və Türkiyə (AGT) regionunda hüquq məsələləri üzrə vitse-prezidenti;
- Şəraf Əsgərova - PMI şirkətinin korporativ əlaqələr üzrə meneceri;
- İlham Əzizov - "iTech Group" MMC-nin təsisçisi və direktoru;
- Orxan Mikayıl - "Aqualink" MMC-nin baş icraçı direktoru.
"AmCham" Azərbaycanın Prezidenti olaraq yeni idarə heyətinin üzvləri arasından "Deloitte" şirkətinin idarəedici partnyoru Nuran Kərimov seçilib.
Yeni idarə heyəti növbəti iki il ərzində "AmCham Azərbaycan"ın ölkədə əlverişli biznes və investisiya mühitinin təşviqi, dövlət-özəl sektor dialoqunun gücləndirilməsi, biznes ictimaiyyətinin maraqlarının müdafiəsi, eləcə də Azərbaycan və ABŞ arasında ticarət, investisiya və iqtisadi əməkdaşlığın inkişafına töhfə vermək istiqamətində fəaliyyətini davam etdirəcək.
"AmCham Azərbaycan" təşkilata rəhbərlik etdiyi dövrdə göstərdiyi liderlik, xidmət və dəyərli töhfələrə görə sabiq prezident Dəyanət Sədullayevə, eləcə də onun sədrliyi ilə fəaliyyət göstərmiş İdarə Heyətinin üzvlərinə dərin təşəkkürünü bildirir, yeni seçilmiş rəhbərliyə isə qarşıdakı fəaliyyətində uğurlar arzulayır.
"AmCham Azərbaycan" haqqında
Azərbaycanda Amerika Ticarət Palatası ("AmCham Azərbaycan") ölkənin aparıcı biznes assosiasiyası olaraq iqtisadiyyatın bütün sektorlarını təmsil edən 280-dən çox üzv şirkət və təşkilatı bir araya gətirir. Palata biznes mühitinin təkmilləşdirilməsi istiqamətində təşəbbüslər, konstruktiv dialoq və strateji əməkdaşlıq vasitəsilə biznes ictimaiyyəti, dövlət qurumları və beynəlxalq tərəfdaşlar arasında etibarlı platforma rolunu oynayaraq Azərbaycanın biznes mühitinin daha da inkişafına töhfə verir.
