“Anadolu” Universiteti təmsilçisindən açıqlama: “Universitetin Azərbaycanda filialı yoxdur” - VİDEO

“Anadolu” Universiteti 1958-ci ildə Türkiyənin dövlət universiteti olaraq qurulub və öz əyani təhsili ilə yanaşı 1982-ci ildən başlayaraq Türkiyədə və dünyada “Açıköğretim Sistemi” üzərindən məsafədən təhsil üsulu ilə uzaqdan təhsil verir.

Türkiyənin Xarici İşlər Nazirliyi və Ali Təhsil Şurasının müvafiq rəylərini nəzərə alaraq universitet 2009-cu ildən başlayaraq Azərbaycandan da tələbə qəbul edir.

“Anadolu” Universiteti qardaş Azərbaycana və azərbaycanlı tələbələrə hər zaman xüsusi əhəmiyyət göstərir. Ulu öndər Heydər Əliyevin adının Türkiyədə, Eskişehirdə əbədiləşdirilməsi, yaşadılması məqsədilə 2013-cü ilin may ayında Azərbaycan Dövlət nümayəndə heyətinin də iştirakı ilə “Anadolu” Universitetində Heydər Əliyev Məlumat və Araşdırma Mərkəzi açılıb.

Universitetin təhsil kоmpleksində əyani təhsil alan türk və azərbaycanlı tələbələrimizlə yanaşı, əcnəbi tələbələr də Azərbaycan haqqında ən dolğun məlumatları Heydər Əliyev Məlumat və Araşdırma Mərkəzindən alırlar.

Onu da qeyd etmək istəyirik ki, son günlər bəzi KİV-də adları açıqlanan xarici universitetlərin Bakı filiallarının siyahısında əsassız olaraq “Anadolu” Universitetinin də adı keçib. Bildirmək istəyirik ki, dünyanın 30-dan çox ölkəsindəki tələbələrə məsafəli təhsil üsulu ilə uzaqdan təhsil verən “Anadolu” Universiteti Azərbaycanda və ümumiyyətlə dünyanın heç bir ölkəsində filial açmayıb.

Onu da əlavə edək ki, Türkiyənin “Anadolu” Dövlət Universiteti pandemiya şəraitində azərbaycanlı abituriyentlərin sağlamlığının qorunması məqsədi ilə 2021/2022-ci tədris ili üçün universitetə distant (məsafəli) təhsil üzrə qəbulu, imtahansız, sadəcə attestatla həyata keçirəcək.

Müraciət üçün:

“Facebook”: @anadoluaz

“Instagram”: anadoluaz

www.anadolu.edu.az

“Anadolu” Universiteti təmsilçisindən açıqlama: “Universitetin Azərbaycanda filialı yoxdur” - VİDEO