"Parlamentdə aşağı faizlərlə kreditləşməni təmin edəcək Aqrar Sənaye Bankının yaradılması təklif olunur".
Oxu.Az xəbər verir ki, bu fikirləri Milli Məclisin deputatı Əli Masimli "Aqrar sahə haqqında" Qanun layihəsinin müzakirəsi zamanı deyib.
Deputat xatırladıb ki, Sovet dönəmində torpaqların 98 faizindən çoxu kolxoz-sovxozların timsalında iri təsərrüfatların əlində idi:
"Texnika və suvarma sistemləri də onlara məxsus idi. Buna baxmayaraq, həmin iri təsərrüfatlar ovaxtkı kənd təsərrüfatının ümumi məhsulunun yalnız üçdə iki hissəsini verirdi. Torpaqların cəmi 1.5-2 faizi əlində olan həyətyanı təsərrüfatlar isə o dövrdə kənd təsərrüfatı istehsalının 35 faizini, heyvandarlıq sahəsində isə 40 faizdən çoxunu təşkil edirdi. İslahatdan sonra torpaqların əksəriyyətinin 1-2 hektarlıq kiçik təsərrüfatlara çevrilməsi və məhsulun 90 faizinin orada istehsal olunması faktı nəzərə alınmalıdır.
Fermerləri narahat edən problemlər, qarşılaşdıqları çətinliklər və süni maneələr sosioloji sorğular vasitəsilə açıq şəkildə ifadə olunmalı və qanunun tənzimlənməsində nəzərə alınmalıdır. Kənd təsərrüfatına ildə 500 milyon manat vəsait qoymaqla orta perspektivdə əsas məhsullar üzrə 5-7% və daha çox artıma nail olmaq mümkündür.
Büdcə vasitəsilə kənd təsərrüfatına bir milyard manatdan çox vəsait yönəldilsə də, iqtisadi artım hələlik potensialdan xeyli aşağıdır".
Deputat alternativ maliyyə mənbəsi kimi aşağı faizlərlə kreditləşməni təmin edəcək Aqrar Sənaye Bankının yaradılmasını təklif edib:
"Dövlət Neft Fondundan təqribən 500 milyon manat vəsaitin həmin bankın ilkin kapitalı kimi ayrılması və sərt nəzarət mexanizmi ilə tətbiqi məqsədəmüvafiqdir. İstehsal olunan məhsulların tarladan süfrəyə qədər olan hissəsində 30%-dən çox itki baş verir ki, bu da mövcud iqtisadi artım templərini üstələyir".
