Azərbaycanda təbiət və aktiv turizm növünün inkişafı üçün tədbirlərin həyata keçirilməsi nəzərdə tutulur.
Oxu.Az xəbər verir ki, bu, Prezident İlham Əliyevin təsdiq etdiyi "Azərbaycan Respublikasında turizmin inkişafına dair 2026-2030-cu illər üçün Dövlət Proqramı"nda əksini tapıb.
Qeyd olunur ki, Azərbaycanda zəngin təbiət ehtiyatları və kənd həyat tərzi təbiət və aktiv turizm növlərinin inkişafı üçün geniş potensiala malikdir.
Bu istiqamətdə görüləcək tədbirlər aşağıdakılardır:
- macəra (ekstremal) turizmi üzrə məhsulların formalaşdırılması və təkmilləşdirilməsi;
- dağ piyada (haykinq və trekinq) turizmi üzrə məhsulların formalaşdırılması və təkmilləşdirilməsi;
- vəhşi təbiət və biomüxtəlifliyin müşahidəsinə əsaslanan turizm üzrə məhsulların formalaşdırılması və təkmilləşdirilməsi;
- Xəzər dənizinin Azərbaycan Respublikasına aid bölməsində və digər su hövzələrində seçilmiş çimərliklərdə abadlıq işlərinin həyata keçirilməsi;
Həmçinin dövlət proqramında qış turizminin inkişaf etdirilməsi də nəzərdə tutulub.
Qeyd olunur ki, son illərdə Azərbaycanda qış turizminin inkişafı istiqamətində mühüm infrastruktur layihələri həyata keçirilib, xüsusilə dağ turizm mərkəzlərinin beynəlxalq turizm bazarlarında tanıdılması istiqamətində tədbirlər görülüb.
Qış idman növləri üzrə beynəlxalq yarışların təşkili ölkənin turizm potensialının artırılması, regionlara turist axınının genişləndirilməsi, eləcə də turizm infrastrukturunun beynəlxalq səviyyədə təşviqi baxımından xüsusi əhəmiyyət daşıyır.
Bu istiqamətdə beynəlxalq əməkdaşlıq çərçivəsində dünyasəviyyəli yarışların təşkili vasitəsilə Azərbaycan Respublikasının beynəlxalq qış turizm destinasiyası kimi tanıdılması, qış turizmi üzrə tanıtım məzmununun hazırlanması və yayımı, rəqəmsal marketinq və beynəlxalq reklam kampaniyalarının həyata keçirilməsi, həmçinin qış turizm məhsullarının və infrastrukturunun inkişaf etdirilməsi görüləcək tədbirlər arasında yer alıb.
