Azərbaycanın tikinti materialları Avropa İttifaqı ölkələrinə ixrac oluna bilər - Baş katib AÇIQLADI

"Azərbaycanın tikinti materiallarının Avropa İttifaqı ölkələrinə ixracı araşdırılır".

Oxu.Az xəbər verir ki, bunu Azərbaycan Tikinti Materialları İstehsalçıları Assosiasiyasının (ATMİA) Baş katibi Şahanə Sarı mətbuat konfransında deyib.

O qeyd edib ki, Azərbaycanın tikinti materiallarının Balkan yarımadası vasitəsilə Avropa ölkələrinə ixracının üzərində iş aparılır:

"Hazırda Avropa İttifaqı ölkələrinə ixrac üçün materiallarının standartı, logistika məsələləri araşdırılır. İlkin qiymət araşdırmasına əsasən, ixrac sərfəli ola bilər".

Şahanə Sarı, həmçinin, Rusiya-Ukrayna müharibəsinin Azərbaycan tikinti sektoruna təsirinə münasibət bildirib:

"Hazırda Rusiya ilə ticarətdə ciddi bir problemlə üzləşməmişik. Rusiyaya Azərbaycanın tikinti materiallarının ixracını artırmaq üçün işlər görürük. Bir neçə ay bundan əvvəl Rusiya Ticarət Müşavirliyi ilə memorandum imzaladıq. Rusiyadan Azərbaycana idxal edilən məhsulun həcmi Azərbaycandan Rusiyaya ixrac edilən məhsulun həcmindən 3 dəfə çoxdur. Biz bunu balanslaşdırmaq üçün sistemli işlərə başlamışıq".

O vurğulayıb ki, Orta Asiya ölkələri bizim üçün hədəf bazardır:

"Bizim bu ölkələrlə ticarətlə bağlı razılaşmalarımız var. Buna görə də şirkətlərimiz bu ölkələrə daha rahat ixrac edə bilirlər. Tikinti məhsullarının daşınması daha çətin olduğuna görə onların bir ölkədən digərinə ixrac olunan zaman rentabelliyi aşağı düşür. Buna görə də qeyd edilən ölkələrə ixrac bizim üçün sərfəlidir".

Aygün Mirakif