Bakıda mənzil almaq istəyən vətəndaş tikinti şirkəti ilə problem yaşayıb.
Bu barədə Oxu.Az-a müraciət edən paytaxt sakini Amalya Adil qızı Babayeva bildirib.
Şikayətçi iddia edir ki, 2021-ci ildə "MM Park" MMC-dən mənzil alıb:
"Layihəyə görə, mənzil Həsən Əliyev küçəsi, 945-ci məhəllədə inşa edilən 18 mərtəbəli binanın 12-ci mərtəbəsində olmalı idi. Müqaviləyə görə, 136.2 kvadratmetrlik mənzil mənə təhvil verilməli idi. Şirkətlə müqavilə imzaladıq. Bir müddətdən sonra məlum oldu ki, bina 11 mərtəbədən ibarətdir və həmin mərtəbədən sonra tikinti aparılmayacaq. Şirkətin direktoru Şahlar Qurbanova müraciət etdik. Məlum oldu ki, Dövlət Şəhərsalma və Arxitektura Komitəsi 2020-ci ildə binanın tikinti sənədlərini ləğv edib və binanın tikintisini dayandırıb. Şahlar Qurbanov isə bizə hər dəfə müxtəlif bəhanələr gətirərək, guya 2 aya binanın yuxarı mərtəbələrinin tikiləcəyini bildirirdi. Sonradan Şahlar Qurbanov bizə 11ci mərtəbədən həmin kvadratla ev təklif etdi. Bildirdi ki, yaxın günlərdə binanın dam örtüyü vurulacaq və mənzilimizə köçəcəyik".
Şikayətçi iddia edir ki, 6 il keçməsinə baxmayaraq binanın dam örtüyü bağlanmır:
"Nəticədə biz evimizi nə ala bilirik, nə də təmir edib köçə bilirik. Dam örtüyü olmayan mənzilə neçə köçək? Hər dəfə Şahlar Qurbanov deyir ki, 2 aya binanın damı bağlanacaq. Amma 6 ildir ki, o bu bəhanələrlə bizi aldadır".
Məsələ ilə bağlı "MM PARK" MMC-nin direktoru Şahlar Qurbanovla əlaqə saxladıq. Sahibkar Oxu.Az-a açıqlamasında məsələdən məlumatlı olduğunu bildirib:
"Şikayətçinin ərizəsi hüquq-mühafizə orqanları tərəfindən də araşdırılıb. Məsələ belədir. Sərəncama görə, bina 18 mərtəbəli olmalı idi və bu barədə binanın layihəsi və bütün digər sənədləri də var. 2020-ci ildə Dövlət Şəhərsalma və Arxitektura Komitəsi işi 11-ci mərtəbədən sonra dayandırdı. Şikayətçini dəvət edib məsələ barədə ona məlumat verdik. Ailə notarial qaydada bizimlə razılaşdı və onun mənzilini 11-ci mərtəbədə eyniölçülü mənzilə dəyişdirdik. Amalya xanım və onun həyat yoldaşı notarial qaydada bizə razılıq verdilər. Vətəndaş istənilən vaxt gəlib, evini təmir edib yaşaya bilər. Həmin vətəndaşın evinin üstü bağlıdır və heç bir təhlükəli vəziyyət də yoxdur. Sadəcə olaraq Dövlət Şəhərsalma və Arxitektura Komitəsi binanın dam örtüyünü bağlamağa icazə vermədiyi üçün biz hələlik işi saxlamışıq. Amma həmin vətəndaşın mənzilinə köçməsinə, təmir edib yaşamasına heç bir maneə yoxdur".
Ş.Qurbanov bildirib ki, 2020-ci ildə Dövlət Şəhərsalma və Arxitektura Komitəsi binanın tikintisini saxlayıb:
"Həmin vaxtdan mən komitənin tikintini saxlaması barədə verdiyi sərəncamın ləğv olunması üçün məhkəmə orqanlarına müraciət etmişəm. Sərəncam məhkəmə tərəfindən araşdırılıb, iş Ali Məhkəməyə qədər gedib çıxıb və mən prosesi udmuşam. Məhkəmə 2023-cü ildə Dövlət Şəhərsalma və Arxitektura Komitəsinin sərəncamının ləğv edilməsi barədə xüsusi qərardad çıxarıb".
