Bakıda yüksəksürətli yolda yerüstü piyada keçidinin inşasına start verilib - FOTO

Bakıda Hava Limanı-Mərdəkan-Zuğulba avtomobil yolunda yerüstü piyada keçidinin inşasına start verilib.

Bu barədə Azərbaycan Avtomobil Yolları Dövlət Agentliyi məlumat yayıb.

Məlumata görə, piyada keçidi Hava Limanı-Mərdəkan-Zuğulba avtomobil yolunun 3-cü km-də inşa olunur. Layihə üzrə keçidin ümumi uzunluğu 51 metr, daxili eni 3,50, pilləkənlərin eni 3 metrdir. Yol səviyyəsindən hündürlüyü 5,8 metr olan keçid orta dayaqdan ibarət, metal konstruksiyalıdır.

Hazırda keçiddə özül svaylarının vurulması işləri aparılır. İki giriş-çıxışdan ibarət olması nəzərdə tutulan keçiddə fiziki məhdudiyyətli insanların rahat hərəkətini təmin etmək üçün müasir lift sistemləri quraşdırılacaq. Layihə çərçivəsində yolun hər iki tərəfində yeni avtobus ciblikləri, avtobus dayanacağının, təhlükəsizlik kameralarının quraşdırılması, keçidin istismarına nəzarət edən işçilər üçün nəzarət otağının tikintisi, piyada keçidinin ətrafında abadlaşdırılma işlərinin görülməsi nəzərdə tutulub

Tədbirlər planına uyğun olaraq növbəti illərdə zəruri olan digər ərazilərdə də piyada keçidlərinin inşası aparılacaq.