Heydər Əliyev prospektində qəzaya görə tətbiq edilən məhdudiyyət aradan qaldırıldı - YENİLƏNİB + FOTO/VİDEO

Bakı şəhəri, Nizami rayonu ərazisində, “Koroğlu” metro stansiyası yaxınlığında yük avtomobilinin aşması nəticəsində yolda hərəkətin müxtəlif istiqamətləri üzrə tətbiq edilən məhdudiyyətlər aradan qaldırılıb.

Bu barədə Daxili İşlər Nazirliyinin (DİN) Nəqliyyatı İntellektual İdarəetmə Mərkəzindən məlumat verilib.

Məlumata əsasən, sözügedən ərazidə baş verən qəza səbəbindən Böyükşor şosesi - metronun “Koroğlu” stansiyası, mərkəz, həmçinin “Koroğlu” metro stansiyası və Qara Qarayev prospekti istiqamətlərində nəqliyyat vasitələrinin hərəkətinə qoyulan məhdudiyyət aradan qaldırılıb.

16:29

Fövqəladə Hallar Nazirliyinin “112” qaynar telefon xəttinə Bakı şəhəri, Nizami rayonu ərazisində, metronun “Koroğlu” stansiyasının yaxınlığında yük avtomobilinin aşması nəticəsində yola yanğıntəhlükəli bitumun dağılması barədə məlumat daxil olub.

Məlumatla əlaqədar dərhal FHN-in Dövlət Yanğından Mühafizə Xidmətinin Nizami Rayon Yanğından Mühafizə Hissəsinin qüvvələri hadisə yerinə cəlb olunub.

Hadisə yerində əməliyyat şəraiti qiymətləndirilərkən “Volvo” markalı, 30 ton tutuma malik çəni olan yük avtomobilinin yolun hərəkət hissəsinə aşması nəticəsində 200 kvadratmetr sahəyə yanğıntəhlükəli bitumun dağıldığı müəyyən edilib.

Yanğınsöndürənlər tərəfindən həyata keçirilmiş tədbirlər nəticəsində ərazidə mümkün yanğın təhlükəsi aradan qaldırılıb.

Heydər Əliyev prospektində qəzaya görə tətbiq edilən məhdudiyyət aradan qaldırıldı - YENİLƏNİB + FOTO/VİDEO

14:48

Fövqəladə Hallar Nazirliyinin “112” qaynar telefon xəttinə Bakı şəhəri, Nizami rayonu ərazisində, “Koroğlu” metro stansiyası yaxınlığında yük avtomobilinin aşması nəticəsində yola yanğıntəhlükəli maye dağılması barədə məlumat daxil olub.

Bu barədə Oxu.Az-a qurumdan bildirilib.

Qeyd olunub ki, ərazidə müvafiq təhlükəsizlik tədbirləri görülməsi üçün dərhal FHN-in Dövlət Yanğından Mühafizə Xidmətinin Nizami Rayon Yanğından Mühafizə Hissəsinin qüvvələri hadisə yerinə cəlb olunublar.

14:08

Heydər Əliyev prospekti, metronun “Koroğlu” stansiyasının qarşısında baş verən avtoqəza səbəbindən nəqliyyat vasitələrinin daha bir istiqamətdə hərəkəti məhdudlaşdırılıb.

Bu barədə Daxili İşlər Nazirliyinin (DİN) Nəqliyyatı İntellektual İdarəetmə Mərkəzindən (NİİM) məlumat verilib.

Bildirilib ki, Böyükşor şosesi - metronun “Koroğlu” stansiyası, həmçinin Qara Qarayev prospekti istiqamətlərində nəqliyyat vasitələrinin hərəkətinə məhdudiyyət tətbiq edilib.

13:38

Heydər Əliyev prospekti, metronun “Koroğlu” stansiyasının qarşısında bitum daşıyan yük maşını aşıb.

Bu barədə Daxili İşlər Nazirliyinin (DİN) Nəqliyyatı İntellektual İdarəetmə Mərkəzindən (NİİM) məlumat verilib.

Bildirilib ki, hadisə nəticəsində avtomobildə olan maye yola dağılıb. Nəqliyyat vasitələrinin hərəkətində çətinlik yarandığından mərkəz istiqamətində, həmçinin Böyükşor şosesi - metronun “Koroğlu” stansiyası istiqamətində avtomobillərin hərəkətinə məhdudiyyət qoyulub.

Qeyd edək ki, baş vermiş hadisə nəticəsində həm mərkəz, həm aeroport yolu istiqamətində sıxlıq yaranıb.

13:31

Bakıda yol-nəqliyyat hadisəsi baş verib.

Oxu.Az xəbər verir ki, qəza Heydər Əliyev prospektində şəhər istiqamətində gedən yolda baş verib.

Yanacaqdaşıyan avtomobili aşıb. Sürücü xəsarət alıb.

Qeyd olunur ki, aşan yanacaqdaşıyan avtomobil olduğu üçün yerə dağılan yanacaq səbəbindən avtomobillərin hərəkətində problem yaranıb.

Nəzrin Vahid